CAGLIARI, 18 APRILE 2008 - Su Presidente de sa Regione, Renato Soru, at faeddadu oe in s'adòbiu de sos Ufìtzios de Sa Limba de totu sa Sardigna, in sa sala Cosseddu de s'Ersu de Casteddu. In concluos de sa dibata, pustis de àere ascurtadu sos parres de sos operadores de sos Isportellos Linguìsticos, at fatu ischire chi sa Giunta Regionale at a presentare deretu unu disinnu de lege subra sa polìtica linguìstica de imbiare a su Consìgiu Regionale pro l'aprovare in antis chi acabet sa legisladura. 

Soru at finas naradu chi b'at a èssere, dae sa Regione, prus apentu pro afortiare sa sa presèntzia de sa limba in sos mèdios de comunicatzione. Su Presidente, in sa relata sua, at marcadu in prus chi est pretzisu de pedire a sa Rai de fàghere finas in Sardigna unu canale regionale bilingue, comente est gia costadu in Friuli. Finas sa lege proposta dae su Presidente diat èssere fata sighende s'esperièntzia friulana. Custu seberu diat èssere finas prus fàtzile sende chi sa Rai, sighende un'acordu intre Ministeru de sa Comunicatzione e Regione, at fatu intrare sa limba sarda in sos programmas de Radio Uno pagu tempos como. 

Su Presidente de sa Regione at galu propostu a sos ufìtzios linguìsticos de traballare paris cun sa Regione pro pònnere in òpera una televisione digitale in limba in Internet chi si diat pòdere pònnere in sos sitos ufitziales de sa Regione. Soru at ammentadu a sos chi fiant presentes su chi su chi at fatu sa Giunta in custos annos mescamente pro torrare a dare dignidade a sa limba sarda sena ruere in impreos folclorìsticos. 

Renato Soru at fatu sa relata sua totu in sardu e at acabadu mentovende chi sa limba si salvat mescamente cando si faeddat e at cumbidadu sos giòvanos de sos ufìtzios a fàghere gasi semper e in onni logu. 

In Sardigna b'amus a die de oe 198 ufìtzios linguìsticos e sos chi bi traballant sunt pro su prus giòvanos. Sos finantziamentos protzedint dae su Dipartimentu de sos Afares Regionales pro more de sa lege 482 de su 1999. 

BIDE SU GIASSU DE SA REGIONE CUN SU VIDEO UFITZIALE