Sòtziu Limba Sarda “Pro s’identidade” est un’organismu voluntarìsticu non guvernativu chene iscopu lucrativu naschiu in su 2000 chi tenet comente punna cussa de amparare sa limba sarda cale sinnu distintu de s’identidade natzionalitària de sa Sardigna. Sa sea printzipale est in Casteddu, ma su Sòtziu reunit una chentina de iscritos chi provenint dae totu sa Sardigna e, in massima parte, dae sas cussorgias de mesu de s’ìsula. Dae cando SLS est in atividade s’est impignau mescamente in sa polìtica limbìstica po fainas de sensibilisatzione de s’impreu de sa limba, sa chistione de s’unidade de sa limba, sa didàtica in is iscolas, sa presentzia in sos mèdios massivos e s’imparu in s’universidade po s’annestru de cuadros formativos po s’ispàinu de su sardu. At promòviu cunvennios po presentare libros, pellìculas e òperas treatrales in limba e atòbios, manifestatziones e cunferentzias po s’imprenta po favorèssere s’aplicatzione de sas leges de bidoria de su sardu regionales e istatales. SLS at ideau e fatu parte de su Comitau abbia a su sardu comunu chi at bogau a campu sa proposta de unidade connota comente “Limba de Mesania”. Su Sòtziu at tentu parte manna fintzas in su Comitau Paris po su Sardu naschiu po cumbàtere su pagu rispetu de sas istitutziones po sa limba sarda. In is ùrtimos tempos SLS s’est intregau in s’agiudu a entes locales po chircare finantziamentos po su bilinguismu cun su mèdiu de sa lege 482/99. Su Sòtziu est s’editore de sa revista-giassu-blog “Diariulimba” chi s’agatat in s’indiritzu internet www.sotziulimbasarda.net. De reghente su ghiadòriu de su sodalìtziu at detzidiu de agghiare una campannia de adesiones noas e de s’aberrere a àteras cumpetentzias e presentzias de sa sotziedade sarda.