Diariulimba est una revista telemàtica in forma de giassu ispetzializadu in sa publicatzione de novas, opiniones e parres subra sa polìtica linguìstica in Sardigna e subra de s’afortiamentu de sa limba sarda e de is àteras limbas presentes in su territòriu sardu. Si faeddat fintzas de polìtica natzionalitària e de argumentos generales bastu chi siat in sardu. Est ativa dae su 19 de su mese de maju 2004 e, de tando a como, at totalizadu cuntatos medas e paginas abertas. A s'in capas est su situ internet iscritu in sardu prus connotu e clicadu. A bias, cando no b'at remèdiu, si iscriet finas in italianu, inglesu, catalanu e àteras limbas.


S’agiornamentu est fitianu e sighidu. Su giassu at sa setzione "Chistiones" in ue sunt publicados sos artìculos prus de importu, intervistas e parres de sa redatzione o de intelletuales e iscritores. A banda b'est sa setzione “In craru” in ue agatant logu interventos de importu particolare chi meressent de abarrare in lughe pro tempus meda. In prus bi sunt sas “novas” in curtzu” chi diant èssere interventos e initziativas de medida minore. 


B'at paritzas rubricas “istòricas” comente "Sèberos de imprenta" in ue si regollint artìculos de giornales digitalizados e "Paritzas" in ue agatant logu interventos finas in italianu. Intro sas initziativas prus de primitia bi sunt de singialare "Iscolimba", cursu a indonu de sardu telemàticu, e "Limba Isorta", giogos, cruciverba e tautogramas in sardu. Cada tantu partit dae s'indiritzu diariulimba@sotziulimbasarda.net una lìtera de novas chi est imbiada a sos utentes prus interessados. Pro dda retzire bastat a s’iscrìere in s'ispàtziu de sa pàgina bàsica dedicadu. 

Dae pagu tempus a como sa redazione est isperimentende finas proas de televisione web in limba e unu forum dedicadu a sos operadores de sa limba sarda.

S’editore est su Sòtziu Limba Sarda, organismu chi tenet sea in Casteddu, ma chi riunit assotziados nàschidos in diferentes biddas e cussòrgias de Sardigna. Sa faina no est pagada cun dinare pùbblicu ma est sustennida in totu cun su volontariadu de sos cumponentes de su Sòtziu. Si cheres iscrìere tue puru imbia sos artìculos o parres tuos, o singiala initziativas semper a diariulimba@sotziulimbasarda.net . 

Sa revista como est direta dae Micheli Ladu. Su primu diretore est istadu Giusepe Coròngiu chi l’at lassada pro andare a dirigere su servìtziu limba sarda de sa Regione Sardigna.