Sa genti chi est abarrada a s’ascuta e at ligiu su chi s’est iscritu in custus mesis ge si nd’est accatada de su chi est movendi.si a giru de sa Lingua Sarda. Cursus de formatzioni, dibatas, articulus e contr’articulus, certus e ingiurius, promissas de leis nobas (seus abetendi a dis), isportellistas chi si bolint atobiai po si cunfrontai a pari.. 
E in sa scola? ita est movendi.si in sa scola? Nci funt pagus interventus in custu giornali de maistus de scola chi faint sciri de su traballu insoru. Est unu peccau, poita ca in sa scola si fait meda cun sa lingua. De candu seus traballendi cun sa lei 26, sa Regioni bolit chi is arresultaus de is progetus bengant mandaus in formau digitali a is offitzius insoru. Iat a essi cosa beni fata chi nci fessit un’archiviu de custus trabballus e si podessint consultai on-line. Funt esperientzias chi iat a tocai a fai connosci in giru po podi ammanniai e ispanniai is arresultaus e ndi tenni unu “corpus” consultabili po totus is personas interessadas. 

Iat a essi puru cosa de importu mannu cussa de si podi atobiai a pari, is maistus interessaus a s’imparu de sa lingua sarda e is referentis de is iscolas, po si podi scambiai is esperientzias e po cuncordai puru una linnia unu pagheddu prus uguallada e aderenti a su chi si narant is leis: sa 26, de immoi innantis sa lei noba e puru sa 482 ca, po sa scola, est ancora beni finantziada.
Propriu sa 482, po s’annu chi est cumentzendi, finantziat progetus po su manixu de sa lingua minoritaria cun su metodu CLIL-ALI (Content and Language Integrated Learning, est a nàrri Apprendimento Linguistico Integrato) . Custu est propriu su chi nci bolit ca aicci si podint imparai materias che sa storia e sa geografia inderetura in sardu iscruffendi duus arresultaus in una borta.

Ma innui funt is libbrus po podi fai custu? Chi nci ndi funt, calincunu ddu fatzat sciri, ca asinuncas, po is maistus, benit a essi traballosu meda,( mancai ge siaus abbituaus a si fai su materiali de nosu e totu) e si podit puru sballiai fadendi donniunu de conca sua. Chi invecias libbrus non nci ndi funt tocat chi sa Regioni finantzit sa preparatzioni de custu materiali didaticu chi de immoi innantis s’at a serbiri po podi traballai cumenti si depit in sa scola.
Sa scola cosa mia, s’Istitutu Cumprensivu de Siliqua, at deliberau ca de occannu s’at a imparai su sardu in orariu curricolari e non sceti in progetus extra. Custu est s’inghitzu po portai s’imparu de sa lingua a su paris de is atras materias e cun sa propriu dinnidadi. E custu imparu depit essi fatu cun is metodus giustus e prus brofetosus, non si depit sballiai: su metodu est cosa de importu mannu po s’imparu in sa scola. 

Po custas arrexonis mi parit importanti chi s’USR aparicit cursus de formatzioni linguistica e metodologica poi is maistus interessaus e finantzit sa preparatzioni de su materiali didaticu .
Abetaus po biri ita narat sa lei noba a pitzus de custus argumentus e in s’interis, chi calincunu collega bolit iscambiai cun mei is esperientzias cosa sua, sa mail cosa mia dda podit domandai a sa redatzioni de Diariulimba.
Seu pronta puru a apariciai un’atobiu in bidda mia cun chi si bolit cunfrontai a pitzus de custus argumentus.
A mellus biri