Duas dies dedicadas a sas limbas de minorias. Coladu un’annu dae sa prima editzione de prèmiu biennale « Città di Sassari –Limbas Minoritàrias-Culturas de sas MInorias », sa Comuna de sa tzitade de Cabu de Susu torrat subra custu tema promovende duas dies de cunvegnos e eventos culturales su 24 e 25 de cabudanni. Sa prima die, in s’àtriu de sa biblioteca de sa facultade de Lìteras e Filosofia est istada presentada sa mostra « Cartografia de sas identidades e de sas minorias » cuidada dae Marina Sechi paris cun sa mustra-videu “S’istat comente in atòngiu in sos arbores sas fògias” a incuru de Carmela Foddai. 


Sa segunda die s’est transida in su Palatzu de Tzitade. A oras de sas 10 s’est tentu su cunvegnu “Assemblea de poetas: unu simpòsiu intre Galles e Sardigna”. A su dibàtitu ant partetzipadu sos iscritores gallesos Menna Elfyn, Harri Pritchard Jones, Ivan Llwyd e William Owen Roberts. Intre sos sardos bi fiant sos acadèmicos Giuseppe Serpillo e Michele Pinna e sos poetas Franco Cocco e Ignazio Delogu. A merie b’at apidu una arrejonada in sa mesa cun totu su comitadu iscientìficu de sa manifestazione. In prus presentada de sas poesias de Nerina Nieddu e Domitilla Mannu, cun acumpangiamentu musicale de Jack Harris e Carlo Doneddu. 


S’esperièntzia de su Galles diat dèpere èssere posta in contu meda dae sos sardos pro paritzos motivos. Duos, intre sos medas, chi b’at assimìgiu pro sa chistione de sa rivitalizatzione de sa limba e sa presèntzia de variedades traditzionales chi cumpetent cun una limba istandard. 


Ignazio Delogu, s’ùrtima die, est istadu unu de sos poetas sardos a si pònnere prus in lughe. Delogu l’ant premiadu s’annu coladu paris cun s’egitzianu Youssef Shahine e àteros tres autores: s’irlandesa Nuala Nì Dhomhnaill, s’ucrainu Irvanets Oleksandr e l’irachenu Yunus Tewfig. <Pro more de custu eventu – at naradu Delogu a La Nuova Sardegna – sa tzitade de Tatari si càndidat comente unu de sos logos prus nòdidos, finas in Europa, in sos cales si traballat pro su fadu bonu de sas limbas de minorias. E su bellu est ca, custas limbas, sunt ormai totu, non petzi faeddadas ma iscritas. Finas su sardu>.