Cada annu in Orthullè sos murradores de Sardigna e de su Mediterràneu si obiant po su campionadu sardu de sa murra, chi ocannu at lòmpidu sa de ùndighi editziones. In su mese de austu (ocannu fiat su noe), in sa bidda ogiastrina a làcana cun sa Barbàgia e sa Baronia, su Sòtziu Culturale Roberto Mulas aparitzat su “Campionadu sardu de sa murra” su torneo prus connotu de Sardigna. E non semus alleghende de murra sarda ebbia: ocannu semus lòmpidos a su de ses campionadu, mutidu “Atòbiu internatzionale de sos murradores de su Mediterràneu”. Pigant parte rapresentantes de totu is pòpulos chi giogant a sa murra, chi amostrant sa giogada issoro e si dda giogant peri cun is murradores sardos. Ocannu sa new entry sunt istados is cadalanos de Juan Carlos de la Ràpita, una bidda de piscadores de sa Cadalùnia de giosso.

Cale sunt is atividades de su Sòtziu bostru?

Su Sòtziu s’impignat in totu is chistiones a inghìriu de s’identidade sarda e de sa cultura de su Pastoriu.
In su 2004, cun unu cumbènniu istobiladu, amus printzipiau unu progetu chi depet de lòmpere a sa valorizatzione de unu de sos produtos prus bonos de su pastoriu sardu, chi est su Càgiu de Crabitu. S’idea est cussa de ddu fàere bessire dae sa clandestinidade, gherrende de ddi dare règulas pro ddu fàghere cunforma a is normas alimentares. Mancat galu unu tretus de fàere, pro tènnere unu càgiu de primmu calidade, ma semus bene afilados e giai como, custa casta de casu (chi si podet nàrrere siet su prus antigu de su mundu) si podet cumercializare. 
Dae su 1998 semus faghende una chirca a pitzu de su Càntidu a Tenore in s’Ogiastra de susu e mascamante in Orthullè (chi est s'ùnica bidda ogiastrina chi at serbadu custa traditzione musicale). 
Àteras chircas, paris cun istudiosos de sa matèria, semus faghende•nde pro sos canes antigos sardos, pesende•nde peri caligunu intre sos chi fiant prus simbigiantes a sos nostranos. 
In su 1998, a pustis de una chirca cun sos antzianos, amus torradu a bogare a pìgiu su Maimone (màscara de su carrasecare orthulleinu) e semus sighende su progetu de muralismu “Memoria e identidade”, in ue faghimus pintare sos sugetos bogados dae sas fotografias antigas de sa bidda. E pro tancare cun su chi semus alleghende como, est istadu su Sòtziu nostru in su 1998 a àere arguidu su primu torneu ufitziale e autorisadu de sa murra, 11 annos a como.

Amus annodadu ca in sa organizatzione de sa murra de Orthullè, totu est in sardu, dae su manifestu a is inditos in bidda, a su cummentu de su speaker. Proite ais fatu custu issèberu?

E proite nono? Mascamente sa murra est giogada in ambientes prus acapiados a sa limba sarda. Amus gherradu de nde bogare totu su chi fiat 'folclore' e impreamus su sardu cun sa dignidade chi ddi deghet. Non est prus folclorismu, in sa manifestatzione su sardu est normalidade, est in su computer, in internet, in su listinu de is prètzios, in sa sinnalètica. Ma peri chi non fiat istada una chistione de murra o de cosa liada a su connotu su sardu bi fiat imbucadu cun onore etotu. Su sardu est a dd'impreare in cale si siat cuntestu. Paris cun s'ingresu, limba internatzionale. Cun s'ordìngiu de su sardu in su Campionadu, deo impreo custa allega: “paret de èssere in Sardinna”. A tempos de oe, chin totu sos dillìrios de custu mundu, chi nos cumparimus a bìdere s’imprus de sas festas, paremus d’essere turistas-istràngios in domo nostra.

Is giogadores acudint dae medas biddas. Comente est chi si cumprendent?

Sos giogadores benint dae totu sa Sardigna e si cumprendent a pare. Peri chi tèngiant diferèntzias fonèticas, sa limba cudda est, su sardu. Amus a pòdere nàrrere ca su giogu de sa murra est fortzis unu de sos primmos esèmpios de istandardizatzione: in sa betada de sos pòddighes, sa summa est aboghinada cun is matessi faeddos dae totus, dae logudoro a Barbàgia a Campidanu chi èsseret: (unu), duos, tres, bàtero, chimbe, ses, sete, oto noe, murra (deghe). Mancu unu giughet imbaros a ddos nàrrere a gasi, e est su ghetu comunu sardu.

S'editzione de ocannu, comente est andada?

Sa cosa prus bella sunt istados is Cadalanos. Una tropa de 42 giogadores chi ant allirgadu su logu. Gente de mare cun gente de monte, piscadores in una bidda de crabàrgios e porcàrgios. 

Pro sa bidda de Orthullè ite bolet nàrrere a ospitare su Campionau Sardu de sa Murra?

Est un'acasione in prus de obiare gente sarda e de foras. Atobiende•dda cun sa cultura nostra berdadera, non cun su folclore. Sa gente aparitzat lompidòrgios, posadas pro acolligire is istràngios. Est s'acasione de fàere tastare is cosas bonas de sa coghina, comente sos culurgiones e su presutu. Si faghet connòschere su fatòrgiu, sos trabballos fatos cun s'iscraria e ateras artisanias de sa bidda nostra. Non est una festa pro sos turistas, est una festa pro sos sardos e sos istràngios, e pròpiu po more de custu sos turistas s'agatant bene, ca non sunt pompiende una mascarada, ma est una festa de beru.

Cale est su trabballu pro fàghere torrare is contos?

Mannu. A su cumentzu amus fatu sa corda a sa musca. Como sos entes pùbblicos ant connotu s'importàntzia de s'eventu e sunt donende una manu de agiudu. Mascamente sa Provìntzia de Ogiastra est agiudende pro ddu fàghere bènnere un'atòbiu internatzionale. 

Bos ant copiadu in àteras biddas, proite como tutu paris aparitzant torneos de murra.

Sa murra est unu giogu chi apartenet a su Populu sardu, non semus nois sos meres. Nos faghet prasere chi in àteras biddas siant arguende torneos e cando podimus ddos agiudamus puru. 
Nois in su 1997 amus fatu una chirca giurìdica e amus cumprèndiu ca si podiat arguire una torneo legale e autorizadu. Nos dispiaghet solu ca in certas biddas ponent dinare e a bias si ponet in mesu certa “murrumballa”, comente si narat, chi a bellu a bellu podet fàghere dannu a custu giogu. Dd'amus bidu peri pro àteras disciplinas comente su dinare afelenat e abolotat su logu.

Programmas pro ocannu chi benit?

Amus a incurare mascamente s'atòbiu internatzionale. Est benende unu puntu de riferimentu pro totu su mundu de sa murra mediterrànea. In prus, semus pro cuncruire unu giassu internet nou www.sociurobertomulas.org (chi s’at a atzùnghere a su de como www.samurra.org) e chi at a ospitare totu is atividades contivigiadas dae su Sòtziu e non solu sa murra. 

Pro tancare, sa murra at a lòmpere a is Olimpìades?

Pro como est mègius chi abbarret in su coro de sos sardos e de sos àteros pòpulos chi dd'ant connota. 

Torramus gràtzia a Fabrìtziu Vella e a su Sòtziu suo, pro nos àere mustradu ca su caminu nostru est a ddu fàere “faghende”, sena murrùngios e sena istraviare, cun s'istima pro sa terra e sa cultura nostra.