Gente meda at sortidu chenàbura dòighi in sa turre aragonesa de Bilartzi. Dae sas noe de mangianu finas a sero a tardu una setantina de operadores linguìsticos est abarradu in sa bidda de su Guilcer pro si relatare e acarare impare subra sos temas de importu in sa polìtica linguìstica chi galu est isbetende sa lege noa dae parte de sa regione pro fàghere fainas prus atzivas a costàgiu de cussa natzionale de sa 482/99. Ammaniadu dae sa Provìntzia de Aristanis cun sa presèntzia de Tore Cubeddu e Marinella Marras b’est istada finas sa presèntzia de s’Assessoradu a sa Cultura cun unos cantos funtzionàrios de su servìtziu limba sarda. 

In su cunvegnu b’at àpidu sos interventos de Gianfranca Piras chi at faeddadu de su sentidu de sa limba e de sa presèntzia de unu operadore in sos entes pùblicos; de Antonello Garau chi at allegadu de su ruolu de totu cussos giòvanos chi traballant pro sa limba in s’amministratzione pùblica, afortiende su cuntzetu chi pro traballare tocat a l’ischire faeddare, lèghere, iscrìere de a beru su sardu; de Nicola Cantalupo chi at chistionadu de su sardu e de sas làcanas falsas chi medas li cherent pònnere. Àteros interventos los ant fatos Diego Corraine, Micheli Ladu, Cristiano Becciu, Mario Sanna e àteros galu dae ue nd’est essidu a campu dibatas a pitzu de s’Universidade, de sa Crèsia, de sa cartellonìstica, ma mescamente de su movimentu etotu. 

A dae chi in medas ant intesu ispadriare sas allegas “comitadu”, luego ant atzapadu sas firmas pro fàghere nàschere su Comitadu 482, òrganu de rapresentàntzia de su movimentu linguìsticu pro dare boghe a chie traballat in su mundu de sa tutela de sa limba sarda. Un’unione pro si relatare cun su servitziu de sa limba in s’Assessoradu ma finas cun su ministeru in Roma, cun sos polìticos locales e finas cun cussos regionales, cun sas minorias in Itàlia e cun cussas europeas. Unu sinnale de unidade contras a chie a su movimentu e a sa limba etotu los bolent partzidos.