Pàulu Innàtziu Pisu, consigeri regionale de 59 annos, connotu in Làconi, bidda sua de nàschida, comente "Paoletto", no impreat paràulas de mediatzione cando faeddat de limba. A bisu suo su Consìgiu regionale diat dèpere luego·luego aprovare una motzione chi permitat a sa Giunta Soru de programmare polìticas linguìsticas prus atzivas. L'at naradu finas in su cungressu reghente de sos ufìtzios linguìsticos fatu pròpiu in sa bidda de su Sartzidanu su 24 austu coladu. Su pùblicu, totu de giòvanos, ascurtende sa parlata sua, at tzacarradu sas manos paritzas bias in presèntzia finas de s'assessora regionale noa de sa Cultura, Maria Antonietta Mòngiu. 



Pisu est una bida chi faghet polìtica. Sìndigu pro duos mandados sighidos, at gherradu finas a s'opositzione unu muntone de annos cando fiat segretàriu natzionale de Democratzia Proletària Sarda. Est istadu unu de sos fundadores in sos Annos Setanta de su Comitadu pro sa Limba e sa Cultura de sos Sardos, at iscridu artìculos, sàgios e unu libru de significu "Storia del Partito Comunista di Sardegna”, chi non faeddat de su Pci, ma de un’àtera formatzione natzionalitàrio-marxista burrada dae su togliatismu in fatu a sa Segunda Gherra Mundiale. Est editore e animadore de sa rivista "Liberatzione". Oe faghet parte de Rifondatzione Comunista sende chi dae minore at militadu in sa F.G.C.I e in su P.C.I. At fatu su presidente de sa Commissione Regionale pro sos deretos tziviles e oe est segretàriu de sa commissione Istatutu. De sa batalla de truncare sas indennidades lucrosas de sos consigeris regionales (finas pro rispetu de sos sardos pòberos) nd'at fatu unu puntu de ghia de sa lìnia polìtica sua. E oe cumentzat a bìdere sos resurtados. 



On. Pisu comente giudicat sa proposta de Limba sarda comuna fata dae s'esecutivu ghiadu dae Renato Soru?

So cumbintu chi est una proposta bona e l'apo sustènnida in cale chi siat sea. Sos megioros chi serbint s’ant a agatare. Sa Sardigna est una natzione e comente natzione si diat dèpere cumportare. Amparare sa limba natzionale, duncas, est unu dovere pro sa classe polìtica sarda. Mescamente pro sos de Manca polìtica ca bi diant chèrrere traballare pro una liberatzione natzionalitària e libertària. Non creo chi bi siat su bisòngiu de ammentare totu sas cuntierras chi amus dèpidu iscaretzire nois a su tempus de su Comitadu de sos Annos Setanta. Mi paret però chi oe sos tempos siant cumpridos pro lòmpere a àteros resurtados finas prus mannos.



Vostè resonat paritzas bias in pùblicu in sardu, sena birgòngia. Proite lu faghet? Retzit crìticas pro custu in s'ambiente polìticu? 

Pro nois in Làconi est normale a faeddare in sardu. Ma dae cando so consigeri regionale mi so abistu - mègius ca l'ischia in antis puru - de a veras de comente sa chistione de sa limba est una chistione mera e sìnchera de democratzia. In su cungressu reghente in bidda ant naradu bene chi sa populatzione est in favore de sa limba, mentres su progressu de sas polìticas linguìsticas est frenadu dae un'oligarchia urbana chi crisat su sardu e chie lu faeddat. Non naro chi est una chistione de classe, ma l'assimìgiat meda. Non b'at de crèere ite idea s'ant fatu de sa limba argunos rapresentantes de sa classe dirigente. Una positzione fea, faddida, chi faghet male a sa Sardigna e sa cultura sarda.



Ite est custa idea?

Est s'idea chi su sardu non siat una limba nen natzionale nen nudda. Chi siat imbetzes unu muntone de dialetos ghetados a pare chi rapresentant su passadu de sa Sardigna e finas s'ignoràntzia, s'incultura e su reatzionarismu. Mancat sa cuscèntzia chi su sardu est una limba e sa Sardigna una natzione pro ite mancat sa connoschèntzia. E s’istadu de como de sa limba est su resurtadu de custa ignoràntzia. No nch’at connoschèntzia de s’istòria, de sa literadura, de s’archeologia. E de sa limba? A l’ischit sa gente ca sa Sardigna est una natzione e no una regione ebbia? No. E lis paret unu machìmine a fàghere unu dialetu limba ufitziale. E duncas s’ignoràntzia sighit a cumandare. In medas ant chertu apitzigare a su sardu s'eticheta de limba de su passatismu culturale e non cherent como mudare idea. Ma forsis sos tempos sunt cambiende.



Pro ite intendet custu cambiamentu? 

Ca sas leges linguìsticas in custos annos, mancari prenas de pecos, ant agiudadu a fàghere sapire sa gente de sa richesa chi est sa limba e sa cultura nostra. Sos datos "polìticos" de sa Chirca Sotziolinguìstica nos mostrant una realidade sarda chi sos contras a sa limba negaiant e chi como in tames est crara a totus. Sos sardos sunt in favore de su bilinguismu, de s'insegnamentu in iscola, de s'istandard ùnicu. Est beru: b'at dificultades a praticare su sardu in pùblicu e in situatziones formales. Est galu difitzile a pesare unu fìgiu totu in sardu. Ma custu dipendet dae su giudìtziu negativu ghetadu dae sa classe dirigente subra cussos chi faeddaiant in sardu. Si podet barigare cun polìticas pretzisas e oportunas. No est chi sos sardos no iscant su sardu, s'intendent in dificultade a lu faeddare cun chie non connoschent. In Làconi l'at ispiegadu bene su sotziologu professor Mongili.



Pro ite semus arribados a custu?

Est unu problema "atrogoladu", comente si narat in bidda mia. Cumplicadu. L'ischimus totus comente est andada s'istòria de sa Sardigna e comente finas sas leges podent megiorare in s'aplicatzione issoro chi a bias est afidada, contras a ogni sentidu achistiadu, a chie est contràriu a su bilinguismu. Ma, mi dimando deo, pro ite su sardu non depet èssere una limba insignada in iscola, praticada a manera normale? Pro ite custu paru de oligarchia culturale la depet frimmare? 



Ite si podet fàghere? 

Mi creo chi siat lòmpidu su tempus chi su Consìgiu regionale torret a s’ocupare de limba sarda. Intro pagu tempus si podet propònnere una motzione trasversale a Dereta e Manca chi pòngiat sa Giunta Soru in cunditziones de fàghere una polìtica linguìstica prus forte de cussa, finas bona, chi at fatu finas a como. Pro nàrrere un'esempru, faghende gasi amus otentu 240 miliones de èuros pro sos trenigheddos birdes chi biàgiant in sas zonas nostras. Su de sos trenos est unu problema de primitia, ma non cantu a sa limba. De seguru.



Ite nde pensat de s’idea de organizare mègius su movimentu linguìsticu? 

Andat bene si no est sa nàschida de unu partidu nou. Cussu diat èssere un’errore mannu. Ma si est, comente s’est ispiegadu bene in Làconi, una retza de operadores linguìsticos pro fàghere prus pressione in sa sotziedade e in sa polìtica andat bene. A una conditzione però…



E cale?

Chi sos chi sunt bènnidos in Làconi, e sos àteros chi traballant o cherent traballare in custu campu, l’acabent de s’intèndere minores, dèbiles, remitanos. S’adòbiu de Làconi l’at mostradu bene meda chi custa retza podet èssere una fortza de contratatzione polìtica forte. A patu chi siat unida e tèngiat sas ideas craras de ite otènnere. Si onniunu pensat petzi a s’ufitzieddu suo, ca bi balàngiat carchi dinareddu, non s’at a andare meda a dae in antis.



Ite tempos at in conca Vostè pro sa motzione?

Cando seis prontos…moemus.