Est in programma pro su 18 e 19 de santugaine in Casteddu un'apuntamentu de importu chi non si podet mancare. Regione e Universidade sunt organizende unu cunvènniu internatzionale in ue s'at a faeddare de sos problemas de impreu de sas limbas minoritàrias in s'amministratzione pùblica. Ant a adobiare in sa capitale sarda espertos sardos, medas italianos e paritzos de àteras natziones. Sa sea seberada pro su cunvènniu at a èssere s'hotel Regina Margherita. Intre sos òspites giai seguros Joan Albert Argenter (Institut d'Estudis Catalans de Bartzellona), Aitor Baiget Carrera (espertu de sa limba otzitana de s'universidade de Lleida), Guido Mensching (romanista de s'universidade de Berlino), Gabriele Iannacaro (linguista de s'universidade de MIlano Bicocca), Vittorio Dall'Aquila (linguista de s'universidade de Genova), Carla Mercato (universidade de su Friuli), William Cisilino (Provìntzia de Udine), Roberto Bolognesi (universidade de Amsterdam) e àteros chi sunt cunfirmende sa presèntzia custas dies. Intre sos sardos Michele Pinna, Cristina Lavinio, Mauro Maxia, Ignazio Putzu, Maurizio Virdis, Giuseppe Corongiu, Paolo Pillonca. At a èssere unu momentu de significu pro sa chistione de sa Limba sarda comuna e pro cumprèndere mègius sèberos, opiniones e esperièntzias. In prus at a èssere s'ocasione pro una riunione noa de su movimentu linguìsticu de totu sa Sardigna.