Is amigos de s’Istitut Cultural Ladin “Cesa de Jan", de Colle S.Lucia in provìncia de Belluno, nos ant mandadu unu giogu imbentadu pro imparare su Ladin Dolomitan, s’istandard intre sas chimbe variantes de sas Regiones Trentino-Alto Adige e Veneto: badiotu, gardenesu, fassanu, fodom e ampetzanu.
Ideadu dae Nadia Chiocchetti, Daria Valentin y Karin Pizzinini e imprentadu dae Chreativ srl, su giogu est istadu premiadu cun su reconnoschimentu "Alta Qualità per l'infanzia Il Grillo" in una festa fata dae su Cunsòrtziu turìsticu Alta Badia in cunventzione cun RAI Tre e RAI Sat Ragazzi e cun su patrotzìniu de su Dipartimentu de Iscièntzias de sa Educatzione de sa Universidade de Bologna, de s’Unicef e de su Antoniano de Bologna.
A Boscele bi podent giogare belle totus, dae sos 3 a sos 99 annos e cheret solu a s’ammentare sas immàzines e èssere origrilèpios. Su giogu est fatu de duos matzos de cartas caffiadas in terra: a una banda b’at una immàzine e suta de issa su nùmene suo comente resultat in sas chimbe variantes ladinas, a s’àtera sa matessi immàzine cun su nùmene in Ladinu Istandard chi si cunfrontat cun àteras limbas europeas che a s’inglesu, su tedescu, su frantzesu e s’italianu. Boscele rechedit pentzi de s’ammentare is immàzines e ue sunt postas, de repètere is faeddos e de agatare sa cumpàngia de sa carta. Cada borta chi si bortant duas cartas uguales si nche movent dae terra e si mantenent in manos. Su giogu accabat cando non b’ant prus cartas in terra e binchet chie tenet prus cartas in manos.
Boscele est una manera lèpia pro si cunfrontare cun is variantes diferentes de sa terra ladina ma finas pro cumprendere chi cara a is àteras limbas europeas bisòngiat de si cunfrontare cun unu istandard.