Robertu caru, sa litera tua, oberta ma iscrita po mei fortzis prus che po is aterus, m'est praxia. Sa brulla no ti dexit meda mancu a tui, ma mi ses praxiu. 

Po su chi proponis de sighir a fai impari, mah, certu, si podit fai, ma mi toccat puru a t'arrespundi ca funti corant'annus a oi  giustus giustus chi deu seu circhendu de fai, iscriendu e ciaciarrendu, propriu su mi chi proponis tui de fai immoi: a circai de cumprendi is  sardus chi seus e chi seus bessius, is maneras di essir e di essir istetius sardus, is tempus e is cosas nostras di oi e (ca no seu  storicu) di ariseramerì in Sardigna e mancai in totu su mundu, poita ca seu pagau po cussu de s'istadu italianu, e ca appu decidiu de fai a  mannu su scrittori, e scrittori sardu sentza cambalis ca sei fillu de messaieddu trexentesu, e seu imparendu s'arti (de scrittori). 

Duncas no seu narendu ca tui cun mei arriscas de fai che su fillu chi bolid imparai a su babbu a fai fillus. Sa litera tua m'est praxia, mancai  m'abarrid sa timoria ca deu e tui seus batallendu e trattendu troppu mali a Niffoi e a is chi anti fattu cussa fiction L'ultima frontiera. 

Ma mi pariad cosa de profetu cuss'articulu miu in La nuova Sardegna, po is sardus chi ligint cussu giornali. Asub'e custas cosas appu scrittu  prus a longu meda, custas cidas passadas puru, po esempru in Lo Straniero, po is continentalis, ca no funti totus a sa tira de sa moda a  sa Niffoi, o mancai po issus puru, chi funti medas, troppus, sardus e furisteris, mancai no andint totus a Orgosolo po la cena pastorale, ma  si spassiant meda a ligi cosas sardas de leppa e bruvura. 

A mei su chi dispraxit de prus est custa Sardigna fatta tottu a sfilada de Sant'Efis,  non ci dda ingurtu, e sciu ca ni deu ni tui mai heus a fai cosas cumenti a s'ammostai a Sant'Efis bistius a sardus schettus. No, no ddu  supportu, e m'inchietu cun genti cumenti a Niffoi candu si bistint a mascara. 

No ddu supportat mancu su becciu de Assandira: e ingunis perou no est cumenti naras tui, ca su becciu ponit su fogu, cussa est cosa chi has bogau a pillu tui, in su libru miu no ddui est iscritu. 

Ma no est cosa importanti, ca tenis cosa mellus de ligi cun attentzioni (a Niffoi mancai). Pagu a sa seria, perou m'inchietu candu mi naras ca seu troppu  siguru de is cosas chi naru e chi scriu. 

Moralista mancai giai, ma no siguru e barrosu. Cussu è difetu prus tuu che miu. Ingolli e ghetta a busciacca. 

No seus totus ugualis, is sardus, no, e nimmancu deu e tui, po fortuna nostra. 

Ma podeus sighir a fai impari sa batalla contras a custa moda de si bistir a mascara po is continentalis e furisteris di onnia arrazza? 

Mi parit ca in custu seus di accordiu, e a ddu cunsiderai puru unu sinnu craru de sa debilesa nostra candu pensaus a nos e totu e si pedeus chi seus oindì in custu mundu strammu.

A mellus biri.

Giulio Angioni