Sunt mòidas sas trasmissiones in sardu de Radio Rai in Sardigna. Subra sete dies de programmatzione de Radio Uno dae sas 12.30 a sas 13.00, tres sunt dedicadas a sa limba sarda. Su lunis, mercuris e sàpadu sunt andende in unda sos programmas apostivigados cun una conventzione intre sa Rai, su Ministeru de sas Comunicatziones e sa Regione Sardigna. “Addisora” e su tìtulu de su programma chi andat su lunis, mentres su mèrcuris b’est "Ego/Deu/Zego" arrejonamentos fatos in istùdiu dae Bachis Bandinu e Giuanne Sanna. Su sàpadu at a èssere dedicadu a sa literadura in limba. 



Unu resultadu mannu chi pagos meses como pariat malu a lòmpere. Una bortada istòrica chi torrat alenu a s'idea de identidade de su pòpulu sardu cun su sinnu prus mannu de sa soberania sua: sa limba. L'ant sutalineadu totus: su presidente de sa Regione Renato Soru, s'assessora de sa Cultura Maria Antonietta Mòngiu e su diretore de sa sea regionale RAI Romano Cannas. In favore sos cummentos in sos giornales puru, pro una bia nessi. 



Maria Antonietta Mòngiu aiat giai acraridu in prus de una ocasione chi sas trasmissiones ant a èssere totu in sardu e chi <s'impreu veiculare de sa limba sarda in sa comunicatzione de su contemporàneu est unu de sas lòmpidas prus artas e de importu, a tretu de torrare a cumpònere divisiones medas>. Su sardu est sa prima limba, paris cun su friulanu, chi resesset a impreare sos deretos prevìdidos dae sa lege istatale 482, lastima chi b'at chertu 9 annos pro resessire a l'aplicare. Sa conventzione est pro un'annu e si podet rennoare a duos. 



Pro su friulanu b’at imbetzes novas malas: sa Giunta noa de su Friulu at detzisu – e male segundu nois - de non cunfirmare sos programmas. Sos ativistas friulanos si sunt chesciende meda. 



Pro sas trasmissione in sardu b’at in Sardigna galu carchi duda subra sa realizatzione. Su comitadu pro s’aplicatzione de sa 482, naschidu dae pagu, at iscritu in su blog suo chi bi cheret prus tempus pro valutare mègius sa programmazione. <Sa trasmissione de su 8-10-2008 paret fata comente si podiat fàghere 10 o 15 annos a como – si leghet in su blog - una trasmissione culturalista, chi non tenet contu de totu su dibàtidu de custos ùrtimos annos, de sas initziativas e de sas prospetivas, mescamente a pustis de sa 482/99>. Su comitadu annontziat chi s’at a informare subra sas àteras. 



In sa riunione tècnica chi aiat detzisu sa programmazione, a segus de una cuntratatzione longa, convocada in Roma su 11 de abrile de ocannu in sa sea de su Ministeru de sa Comunicatzione e cherta dae su ministru Gentiloni fiant presentes Sabrina Bono (Ministeru), Giovanni Melodia e Stefano Lupi (RAI - Roma), Romano Cannas (RAI - Casteddu), Maria Antonietta Mongiu, Michela Melis e Giuseppe Corongiu (Regione Sardigna).