|
Mi praxit meda su chi scrit Gianfrancu Pintore in custas paginas,
cumenti puru in su blog cosa sua: issu est donendi unu contributu de
importu a sa chistioni de sa limba e a medas atras cosas chi
pertocant su ruolu de is istitutzionis sardas e s’interessiu
generali de sa Sardinnia.S’urtimu articulu però m’est abarrau unu
pagu indigestu: difatis po sighiri a criticai sa scola e s’universidadi
po su chi ant fatu o non ant fatu in favori de sa lingua sarda,
immoi ddas donat nexis chi non tenint.
Fueddu po sa scola primaria.
Issu narat:
Como est totu unu pranghe pranghe ca in Sardinna si cherent tancare
sas iscolas in sa biddas minores, a riscu de disparèssida. Ma in
Itàlia sas biddas gasi sunt prus de 2800: pro ite in ive eja e
inoghe nono? In ite sas iscolas sardas sunt diferentes dae sas
italianas, si non si ponet mente chi s'ùniga resone est in su fatu
chi in Sardinna b'at una limba diferente dae s'italianu?
Custu arrexonu propriu non ddu cumprendu. Su fatu chi in Italia puru
ddoi siant scolas in biddas piticas chi sa ministra bolit serrai non
giustificat nudda: is iscolas non depint serrai né in Sardinnia e
nemancu in Italia, ca una bidda, specia chi est pitica, chentza sa
scola si morit. Chentza de contai ca non si depint custringi is
pipius de 6 annus a fai is pendolaris. Custu foras de sa chistioni
chi in d’unu logu nci siat o non nci siat una lingua diferente de s’italianu.
Ita nc’intrat custu cun su pendolarismo de is pipius? E cun su
brivai una bidda de sa scola sua? Is pipius de s’Abruzzu o de sa
Basilicata o de sa Toscana, ca non tenint una lingua diferente de s’italianu
de imparai in sa scola, si minescint forsis de fai is pendolaris
poita ca sa ministra (intzullada de Tremonti) bolit arrisparmiai a
pitzus de unu servitziu essentziali comenti sa scola?
E apustis sighit:
Narant chi su mastru ùnicu no andat bene. E carchi unu s'atrivit a
nàrrere chi bi cheret unu mastru chi imparet a sos pitzinnos un'àtera
limba. Su sardu? Mancu acurtzu: s'ingresu. E puru, cherende, sa
Regione aiat dèvidu apogiare sos mastros chi aerent pedidu unu
segundu mastru pro su sardu. Nudda. E tando, comente si narat, a
chie si istròpiat a manos suas non si pòngiat a prànghere.
Su maistru unicu non bandat prus beni no, ca troppu cosas funt
cambiadas de candu unu maistru tutologu mandàt ainnantis sa propriu
classi po 5 annus fadendi totus is materias issu.In sa scola
elementari puri nci bolint is specializzatzionis, ca non est prus sa
scola innui si imparat sceti a ligi, scriri e fai contus. Sa scola
elementari (oi dda tzerriant primaria) fiat s’unica chi si sarvàt in
su sistema scolasticu italianu: nd’est bessida a is primus postus in
graduatorias europeas. E tenit abbisongiu de maistrus de inglesu
commenti de sardu, e chi non fessit po mori de custu arretramentu,
nci festus puru arribendi bellu a bellu a inghitzai cun su sardu in
sa scola. Ca sa scola puru at tentu abisongiu, cumenti s’arrestu de
sa sotziedadi, de pigai cuscientzia ca sa lingua sarda si depit
torrai a imparai. E immoi? Ita eus a podi fai in una scola chi dd’incurtzant
is oras de letzioni, is maistrus e su dinai? Ma ita boleus fai candu
in Italia a si guvernai ddoi est genti innioranti e incompetenti?
Narat Pintore ca custa ministra fait su doveri suu de ministra
italiana. Custa ministra est fadendi su prexeri de su sistema
scolasticu privau! Issa bolit distrugi sa scola pubblica po
ammanniai sa privada. Issa est punnendi a unu sistema che cussu
americanu: chini si ddu podit permiti pagat is servitzius bonus, is
atrus si pigant su scartu. Custu est a fai su doveri de ministra
italiana? Ma ita ndi scit custa ministra de sa scola? Sa punna bera
de totu sa riforma est sceti s’arrisparmiu, e sceti genti innioranti
arrisparmiat in sa scola e sa cultura. Assimbillada dd’ant a sa
Finlandia! Innias candu su stadu est in crisi ponint prus dinai in
sa scola, poita scint ca de aici ndi ddu torrant in su benidori. In
Italia non arribaus a ddu cumprendi, o fortzis poi is chi si
guvernant est giustu aici, ca est mellus a guvernai genti innioranti
ca non si pesat a murrungiai.
|