Su tempus est mudende e andamus cara a s’istajone frida. Si podet serrare duncas finas su bilantzu chi pertenet a sos fogos chi cust’annu at mustradu nùmeros bonos e mègius de sos annos in antis. Custu est emmo acadèssidu pro s’impinnu coordinadu de sas fortzas intregadas a s’averiguada de su territoriu ma b’at de sinnalare finas pro sa prima borta s’impitu in sa comunicatzione a sa gente de sos inditos fatos in limba sarda.

S’assessore regionale de s’Ambiente, Cicito Morittu, at fatu unu bilantzu de sa luta a sos fogos mustrende nùmeros chi donant ispera pro su benidore in una Sardigna chi est istada terra de sas pampas prus de àteras regiones in tempos colados. Ocannu ddoe sunt istados 492 fogos in mancu de sa mèdia de sos ùrtimos annos e cun feti 1/3 de sos 18 mìgia ètaros ètaros abrusiados semper in mèdia. B’at àpidu un’impitu prus mannu de òmines e de mèdios cun elicòteros, elitanker e canadair.

S’annanghet duncas fintzas s’impreu de una comunicatzione capillare, dae domo in domo, e sa presèntzia de sa limba sarda in su territòriu, gasi comente si faghiat a sos tempos de sa carta de logu. Pro more de su traballu de s'Ufìtziu de sa limba sarda de sa Regione Sardigna, sa gente at pòdidu lèghere sos cartellos apicados in sas comunas bidende finas in limba nadia sos inditos a pitzu de sas doas de amparu, sos abrusiamentos e sas fainas de fàghere pro cumbàtere unu de sos dannos peus pro s’ambiente e sos padentes de sa Sardigna, cun una comunicatzione prus serente a su territòriu e a sa gente.