Est nàschidu, dae su cunvegnu de Bilartzi de su 12 de cabudanni coladu, su Comitadu pro afortire su movimentu in favore de s'ufitzialidade de sa limba sarda comente est cuntempladu in sa Lege 482 de su 1999 de sa Repùblica Italiana. “Comitadu 482” est su nùmene e diat depère serbire pro dare unu puntu de ghia a su movimentu linguìsticu e pro fàghere “pressione” e “lobby” a bias a sa classe dirigente sarda a fines de rispetare sa lege de su bilinguismu e pro nde fàghere una sarda. 



Su parre de Diariulimba e de su Sòtziu Limba Sarda est chi tocat de aderire in medas, nessi sos ativistas e sos chi cherent traballare pro sa limba, sena pro custu renuntziare a sas sìngulas identidades de assòtzios, istitutos o realidades linguìsticas chi depent sighire a si mantènnere finas in foras de su comitadu. Sa revista Diariulimba e su Sòtziu Limba Sarda aderint duncas a su Comitadu 482. 



Segundu sos primos puntos de su programma iscritos in su blog de su comitadu si tratat de un'assòtziu lìberu, ispontàneu e informale, non ligadu a perunu ente o movimentu, chi tenet comente finalidades fundamentales:



—operare pro s'aplicatzione cumpreta de sa Lege 482 (dae como in antis "sa Lege")

—controllare chi sos disinnos e sas atziones de sos Entes siant coerentes cun sa Lege matessi

—informare s'opinione pùblica de sos isvilupos, de s'aplicatzione e finas de sa "no aplicatzione" de sa Lege

—leare initziativas de sensibilizatzione in favore de s'aplicatzione de sa Lege

—fàghere pressiones, propostas, a sos Entes, a sas Istitutziones e a sos partidos polìticos

—controllare sos efetos de s'aplicatzione de sa Lege e manifestare sos atentados a sa Lege

—leare finas initziativas legales pro difèndere s'aplicatzione coerente de sa Lege.



Su nùmene provisòriu de s'assòtziu est "Comitadu 482, pro s'ufitzialidade de sa limba sarda"

S'assemblea provisòria de su C482 est formada dae sas pessones chi ant dadu sa disponibilidade issoro su 12-9-2008 e de sos àteros chi cherent aderire. 



S'organizatzione de su Comitadu482 e finas sas finalidades craras ant a èssere detzìdidos dae sa prima assemblea de sos membros chi at a èssere autocunvocada dae s'Assemblea provisòria.



Nois pensamus chi balet su tantu de si che pònnere a faeddare e resonare, sena pèrdere prus tempus, e traballare paris finas foras de sas istitutziones. Su primu obietivu diat dèpere èssere cussu de ammentare chi bi cheret una lege de polìtica linguìstica noa pro sa limba sarda.



Pro como, e finas a una detzisione contrària, podent imbiare:



—Cumentos a sas "lìteras impostadas" a su blog: chie si siat

—Lìteras: sos iscritos a su C482


Si ses interessadu a leare parte in su Comitadu 482, iscrie a:


comitadu482@gmail.com 

o

diariulimba@sotziulimbasarda.net 


e sighi su blog 

http://comitadu482.blogspot.com/


Leghe finas in: 


http://www.sotziulimbasarda.net/settembre2008/bilartzi.htm