Dàriu Piga at presentadu in Nùgoro, chenàbura 26 cabudanni a sas 20:00, in sa sede de sa L.U.M. (Lìbera Universidade de su Mediterràneu), sas poesìas inèditas de su poete de Pèrfugas Frantziscu Piga "Ciciu Piga Senior". Subra cust'interessante operatzione b'est su dutor Dàriu Piga, coordinadore de su Ufìtziu LimbaS de su sòtziu culturale "Oberaìa de Santu Jorzi de Pèrfugas", trintaduos annos, laureadu a sa Università degli Studi di Perugia in Lettere e Filosofia cun d'una tesi subra su sardu e su catalanu-aligheresu. Como est a su 9° annu de Chiterra Flamenca in su Conservatorio Profesional Musical de Jerez de la Frontera, in sa provintzia de Càdis, in Andalussìa.


A pustis de annos meda, investighende subra informatziones dadas finas in documentos antigos, remunidos in sos archivios de sa cheia de Nostra Senniora de sos ànghelos in Pèrfugas, e a pustis de vàrias interpretatziones de s'unicu "corpus" de poesias de Frantziscu Piga, su dutor Piga at torradu a sa bidda sua, Pèrfugas, e a sa Sardinnia tota, una regolta de poesias da-e su valore limbìsticu-literariu altu meda.


Si tratat de su primu volùmene, vintiduas poesias chi currispondent a sa meidade de tota sa produtzione de su poete; s'àbera est carateritzada da-e una variedade limbìstica piena de àteros elementos diatòpicos sardos, pròpios de una sèbera coerente e madura chi solu una mente lìbera e piena de nobilesa podat prodùere.

Frantziscu Piga, mezus connotu comente "Ciciu Piga Senior" o "su Primu Ciciu", est presente fintzas a como in s'imaginariu culletivu sardu, gratzias finas pro èssere istadu fentomadu da-e grandes poetas improvisadores de su noighentos comente Barore Sassu chi, indichèndelu comente modellu de sa poesia sarda, lu definit comente unu de sos "padres fundadores", un eroe culturale de sa produtzione literaria isolana:


Su primu Ciciu in tempus sou /

fit su chi in Sardinnia poesia at inventadu /

su sigundu Ciciu, babu tou /

cun sa poesia in terra sarda s'est immortaladu[...]


Un àtera citatzione importante subra Frantziscu Piga s'agatat in d' unu componimentu de su poete de tzaramonte Bainzu Truddaiu, publicadu in sa revista de cultura e limba sarda, "Sardu so":


Fit Ciciu Piga che una campana /

armoniosa in poèticu cantu /

e-i su babu ateretantu /

fit de rimas bundante una funtana /





Sigundu sas informatziones cuntènnidas in su quinque liber de sa cheia de Pèrfugas, Frantziscu Piga nascheit in su 1850 da-e Juanne Antoni Piga, poete finas issu, e Nicoleta Piga.

Morzeit in tènnera edade, s'oto de su mese de martu de su 1887, pagos meses primu chi nascheret s'ùltimu fizu sou, Frantziscu Piga, mezus connotu comente Ciciu "Junior" (1887-1962), ùnicu erede de sa passione de su babu, chi a dolu mannu no at connotu mai.



De sa vida de Frantziscu Piga senior atualmente s'ant pagas notitzias e calcuna est istada tramandada oralmente da-e calchi informadore presente in sa comunidade de Pèrfugas, sigundu cale su poete istudièit in d'unu cunventu de padres in Casteddu (de josso) gratzias finas a Fra Jorzi Piga chi est istadu cunsizeri de su paba Pio IX.



Importante est sa prefatzione frimmada da-e su docente gaditanu (de Càdiz) Juan Jesus Payan Martìn de sa Universidad de Càdiz. S'istudiosu, a pustis de àere delineadu sos tratos peculiares chi ant caraterizadu s' istoria antropològica, limbìstica e polìtica de sa Sardinnia, ponet custas cumpositziones in d'una ispetzie de "risorgimentu" de sa produtzione literaria in limba sarda, parallela a cussa galitziana e catalana e/o in àteras realidades culturales minoritàrias europeas.




Pro informatziones: 328 4151667 o finas 333 3130178.
oberaiasantujorziperfugas@hotmail.com

www.myspace.com/ciciupigasenior