|
M’at fatu prexeri meda chi Pintore apat torrau
sceda a s’articulu miu circhendi de fai cumprendi mellus su chi
boliat nai ma, chi mi donant spaziu in sa revista, bolu nai ancora
is cosas chi non m’aggradant de su pensamentu suu e spiegai is atras
chi issu non at cumprendiu de su miu, ca forsis non mi seu spiegada
beni.
Gianfrancu narat:
“Su chi non m’aggradat in sa pelea chi s’est pesada est su càrrigu
ideològicu e de ischirriamentu partitigu. E chirco de mi fàghere
cumprèndere cun una pàia de chistiones.
Sa prima est chi si male faghet sa ministra Gelmini, de su Pdl, a
pessare de tancare iscolas, male at fatu su ministru Berlinguer,
Pci, a àere tancadu sas iscolas a sos tempos chi guvernaiat. Su
matessi pessu non podet èssere bonu si est leadu dae sa manca e feu
si est leadu dae sa destra. Est beru a s’imbesse puru, craru.”
Est berus ca est stetiu Berlinguer a aberri carreras innui apusti
ant potziu curri is atrus, ma cussa borta non nci fiat stetiu un’ataccu
a s’istituzioni scolastica cumenti a cussu de oi. In cussa riforma,
chi non fiat andada ainnantis, non nci fiat sa punna de arrisparmiai
pudendi finsas is gambus bonus, nci fiat sa bidea de razionalizzai
su sistema. Genti meda non iat aggradessiu e su ministru si fiat
depiu dimiti. Si ndi fiat andau e chentza chi nci fessit stetiu totu
s’avolotu de oi.
Deu custu carrigu ideologicu e de ischirriamentu partitigu, scusa-mì,
ma non nci ddu biu. Deu biu genti de sa sotziedadi tzivili, babus e
mammas, insenniantis e studentis chi funt chesciendi-si, non po sa
riforma (ca de riforma non dd’at), ma po cussu chi funt perdendi-nci.
Funt perdendi tempo-scuola a cumentzai de s’asilu (sceti a mengianu
ddu bolint lassai e a meigama si ddu paghint is famillias chi tenint
dinai!). In sa scola primaria de 30 oras ndi calaus a 24 e in is
medias de 36 a 29! E is oras truncadas de su 50% a is pipius cun
handicap? Est una chistioni ideologica a s’avolotai po custu? Oppuru
est sa timoria chi sa scola, giai posta mali de innantis, at a essi
peus de su chi est immoi? Deu ca traballu de 30 annus in sa scola
primaria ti potzu nai ca sa scola at a essi peus de immui innantis.
E ti ddu nau non po ideologia ma po esperientzia, ca seu stetia puru
maista unica.
Naras apustis:
“ne in su decretu oe lege ne in sas decraratziones suas ne in sos
papiros chi ant amaniadu sos espertos suos apo agatadu una paràula
chi est una chi punnet a dare prus podere a s’iscola privada. E
tando che a Tomasu chèrgio bìdere, tocare. Non mi cuntentant sos chi
narant: “Custa podet èssere sa torrada de…”.
Tenis arrexoni, in su decretu non ddoi est scritu,( iat a essi bellu
puru chi ddu ponessit craru ca pigat a fillastu po donai a fillu! ),
e non est s’ideologia chi mi fait pensai ca aici ant a bandai is
cosas. Ita atru ant a fai cussas famillias chi non podint lassai
prus is pipius in s’asilu finsas a is 4 de a merì? Ddus ant a mandai
a is iscolas privadas (chi tenint dinai), asinuncas ddus lassant in
domu a si scimprai castiendi sa televisioni. E sa propriu cosa at a
sutzedi in sa scola primaria e media candu at a essi aici malipigada
ca, cussus chi podint s’ant arrivolgi a is privadas. Cumenti est in
America là, anca ddoi est sa scola de eccellenza a pagamentu e sa
scola malipigada poi is poburus. E cussus chi tenint sa sorti de
andai a inniri po si specialitzai ddu faint poita ca innoi non
ponint dinai po fai sa circa e de immoi innantis at essi ancora peus.
Su sistema scolasticu italianu fait acqua de stampus meda e deu non
seu difendendi su chi est de cambiai, ma custa non est sa riforma
chi at amelliorai sa scola e non est su “furori ideologicu” chi mi
ddu fait nai.
In una cosa seu de accordiu cun tui Gianfrancu, sigheus a traballai
po sa Sardinnia e po su sardu in sa scola e in donnia logu, e ti nau
ca fais beni a tzerriai chi si fatzat de prus de su chi s’est fatu
finsas a immoi, ma non pighis preocupatzionis beras po ideologias
chi custa borta mi parit ca sa magioria non est setzendi a cuaddu.
|