|
|
Diretore: Micheli Ladu - Editore: Sòtziu
Limba Sarda
|
|
CHISTIONES
|
15/11/2008
Faccis de sola
[de Roberto Bolognesi] |
Pintore est stetiu tropu bonu cun Pietro Picciau, su giornalista de
s’Unione chi at scritu cuss’articuleddu po fueddai mali de sa LSC.
Giuanne Frantziscu dd’at fatu sceti fai sa parti de unu chi
cumprendit pagu.
A mei, cuss’articuleddu m’at fatu un’atru effetu, prus ca e totu
candu Piciau fait nai a Blasco Ferrer: “Come uscirne? «Aprendo una
discussione. Se si vuole uno standard unico, si provi a individuare
una e solo una varietà linguistica, sulla quale improntare poi la
norma. Altrimenti si rispetti la storia, e si imitino quei paesi
democratici e moderni che hanno codificato due standard, venendo
incontro alla volontà popolare».”
Pintore non scit—e non podit sciri, ca deu non si dd’apu contau—ca
s’arrespusta a s’atru articulu de Blasco chi apu pubblicau in
Diariulimba (http://www.sotziulimbasarda.net/settembre2008/boloblasco.htm)
a primu dd’apu mandada a s’Unione, comenti est giustu, biendi ca
Blasco iat scritu in cussu giornali.
Candu apu telefonau a sa “segretaria de redazione”, po intendi chi
fiat arribbau, issa m’at nau ca s’articulu miu dd’iant a mandai a
Blasco Ferrer po si ddu fai ligi.
Deu immoi non sciu chi su motivu est cussu—insomma, ca Blasco at
postu su vetu—ma fatu stait ca deu non apu intendiu prus nudda e s’arrespusta
mia non dd’ant pubblicada mai.
Est craru ca in s’articulu miu Blasco figura bella non ndi fait, ma
a nai ca est stetiu issu a non ddu fai pubblicai iat essi una “speculatzioni”.
Duncas deu non mi permitu de nai ca est issu ca discussioni non ndi
bolit, a su mancu cun genti chi podit ammostrai ca issu is cosas o
non ddas scit o non ddas cumprendit (o totu e is duus!). Potzu nai
però ca s’Unioni at scioberau de non fai fai una parti legia a
Blasco Ferrer.
Duncas deu nau: discussioni cun Blasco? Ellus ca no?! Ma sceti a
pustis chi issu s’at fatu is compitus e s’at ligiu s’analisi
computatzionali chi apu fatu deu de sa relata intra de sa LSC e is
dialetus de su connotu. Chi unu pretendit de discuti sceti a subra
de is cosas chi at nau Wagner e is atrus linguistas “delle caverne”
a pitzus de su sardu e de inniorai totu sa cosa fata de is atrus est
sceti pighendi in giru sa genti.
E biu ca nci seu, tiru una stocada puru a Pepe Corongiu, ca immoi ca
s’est setziu in una bella carida de s’Assessorau a sa Cultura, parit
chi si ndi siat scadesciu de su chi serbit a sa lingua nostra: una
lei noa, a intrai in sa scola e a ammilliorai sa LSC po ndi pigai
cali-si-siat argumentu a is “campidanesi di professione”, ca non
fueddant mai po defendi su sardu, ma sceti po atacai a sa LSC.
Non est sceti a si setzi in sa carida, est a si movi puru!
|
|
|