Faeddare a sa gente sarda cun sa limba sua nadia fintzas de cosas chi podent pàrrere malas a cumprèndere o chi a calicunu podet pàrrere feu e peleosu a fàghere. Faeddare in limba sarda de tassatzione, reatos tributàrios ma fintzas de detratziones. Ma faeddare in antis de totu de sos deretos de su contribuente in sardu in s’annu chi s’ONU at proclamadu su 2008 “Annu internatzionale de sas limbas” unu de sos deretos prus mannos chi tenet s’òmine. Custa est s’idea chi at tentu s’Agentzia de sas Intradas chi at chertu pro su 2008 sa bortadura in sardu de s’Annuàriu de su contribuente.

In s’aposentu mannu de sa sea de via Bacaredda in Casteddu ant adòbiadu sa gente interessada, s’Assessore Eliseo Spiga, su Diretore Regionale de s’Agentzia Guglielmo Montone, su Diretore Generale Gianluigi Giuliano, sa Diretora de su Servìtziu Trasparèntzia e Comunicatzione de sa Regione Sardigna Dut.sa Melis, sa Diretora Marilena Mùrgia e su Dutore Gaetano De Feo de su Tzentru de Assistèntzia Multicanale de Casteddu paris a sos tradutores de s’Ufìtziu de sa limba sarda de sa Regione chi ant bortadu in sardu su traballu.

A parre de Guglielmo Montone, s’Annuàriu de su contribuente in sardu assegurat una presèntzia forte in su territòriu sighende sa punna chi s’Agentzia de sas Intradas tenet dae paritzu tempus: èssere serente a sos tzitadinos. E custu ammentende fintzas batallas che a sa vertèntzia cun s’Istadu de su 2006 pro dare a sa Sardigna cussu chi li tocaiat dae sa tassatzione sua etotu.

“At a pàrrere cosa istravanada si naro chi a pagare sas tassas est una cosa bella – at sighidu s’Assessore Spiga, riende•si•dda unu pagu – ma custa est sa punna sèria: ca si totu cantos pagamus, totu cantos amus a èssere cuntentos, su discuntentu naschet cando pagos pensant de fàghere sos furbos”. Unu cuntzetu duncas de responsabilidade colletiva, chi giai fiat presente in tempos colados ma pertzisu fortzis fintzas in tempos de oe. “Est unu sinnale forte e de guvernu bonu – at congruidu- chi su primu capìtulu de s’Annuàriu faeddet de sos deretos de su contribuente e non de sas santzione ca acòstiat de prus sa gente a custos temas e faghende•ddu in sardu custu acàpiu est galu de prus forte”

At serradu sa resonada su Diretore Giuliano chi girende in totu sa Sardigna at connotu realidades diferentes ma s’est abigiadu fintzas chi a faeddare cun sa gente fintzas in sardu est unu agiudu mannu pro sas istitutziones.

Leghe fintzas sa crònaca de s'Agentzia de sas Intradas