In tempos de volos a “istracu baratu” o “low cost” sa Sardigna est parada in sa crònaca de custas dies a tesu meda dae s’Europa, dae su Mediterràneu ma mescamente dae sa tzivilidade e dae sos annos de su 2000. Unu giùighe de Hannover chi pro traballu depiat fàghere su pre-giùighe ca est maistru de pre-giudìtzios at iscanduladu sa gente sarda cun una sentèntzia de ispantu donende a un’òmine (si gasi si podet mutire) chi aiat violentadu sa ex sposa pro tres chidas bonas, un’iscontu de pena de duos annos reconnoschende ”attenuanti etniche e culturali” ca fiat sardu. 

Su rennegu e sa chènscia de sos Sardos no at istentadu a lòmpere: ratzista, innorante, buchibentu. A mene custa cosa m’at fatu neghidare ma non m’at ispantadu. Cumprendo chi pàrgiat cosa istravanada , ma custu est su parre meu. 

E su chi mi pregonto est: pro ite sa Sardigna e unu Sardu?

 E mi lu pregonto ca penso chi si fiat costadu a unu Maiorchinu o a unu de sas ìsulas Baleares custa cosa non bi diat èssere istada. In cussas ìsulas bi sunt unu muntone de tedescos tantu de las cunsiderare su de 17 Land de sa Germània, b’at una limba de minoria (ufitziale), b’at mare e sole, costumas e costùmenes, durches tìpicos che a s’ensaimada (comente pro nois sa seada), pastores, berbeghes e porcos nieddos chi nde faghent una “sobrassada” lichita. Est un’ìsula in su Mediterràneu che a sa nostra e finas prus minore e mancari gasi, nde so seguru, cussu giùighe a unu de cue una cosa gasi no la diat àere mai fata. 

Ello tando pro nois?

  Emmo. Ca nois abbaidamus a su pòddighe e non bidimus sa Luna. Ghetamus curpas a unu tedescu chi mancari l’at fatu in divarda ma cuamus àteras neghes. 

Ello pro ite tando? 

No intro in sa conca de sas pessones ma diat pòdere agiudare a lèghere unu libru de su biadu de Sergio Atzeni “Raccontar fole” imprentadu dae Sellerio in ue si contat de una Sardigna connota e contada dae sos biagiadores de s’ otighentos e finas tedescos comente un’ìsula chi, in tempos de revolutziones in s’acabu de su setighentos, fiat bida comente carchi cosa de innuiladu, a tesu e alindada dae sa tzivilidade. “Esòtica” li diat grabare. Custu est unu bìculu de su “Raccontar fole”  in ue su biadu de Atzeni matessi podet dare una resposta a su chi est costende in custas dies:

“Per sessant'anni, dunque, Lipsia ha avuto l'esclusiva sulle notizie dalla Sardegna per l'intero continente, e segnatamente per i paesi di lingua tedesca, e ha pubblicato due opere: la prima comprende l' erba del riso sardonico e i muflonl putrefatti a branchi, la seconda la malaria che corre a zigzag. 

Un lettore di fiabe potrebbe supporre una spiegazione climatico-culturale: il popolo di Lipsia amava leggere fiabe, e soltanto fiabe, per cui i librai di Lipsia vendevano libri di fiabe, gli editori stampavano libri di fiabe egli scrittori scrivevano libri di fiabe. Quanti avessero voluto evitare l'ambientazione scontata e solita della Selva Nera trovavano ottimi spunti nello scenario sardo: lontano e sconosciuto, vicino alle mille e una notte, forse perfino più remoto.

Preferisco una spiegazione differente, anche se altrettanto avventurata di quella che precede. L 'anonimo autore del secondo libro non si è mai mosso da Lipsia e soprattutto non è mai venuto in Sardegna. Palesemente e in più frasi, del resto, la sua opera è una copia del primo libro. La stessa storia della malaria di fuoco è stata anticipata da Joseph Fuos. Secondo lui faceva sbiancare i capelli alle sentinelle”. 

Pro su giùighe de Hannover si podet nàrrere chi bàgiant ambas, ma fintzas a cando sos matessi sardos non s’ischìtzinat custa casta de moda de su ”esòtico” bèndidu pro identidade in su faghe∙faghe chi si faghet a fainu, tenimus àsiu de isbetare chi lu fatzant sos tedescos “raccontando fole” subra  nois, pro cussu bellagai giai semus capassos a lu fàghere nois etotu.