“Adios bona sera
bos lasso amada zente
su coro meu inoghe...”


A sessantanoe annos est mortu Zosepe Chelo.
Naschidu in Tatari in su 1938 dae genitores de Òsilo e de Sènnori, aiat cumintzadu a cantare dae piseddu minore sighende sas garas de càntigu a chiterra in sas biddas acurtzu a Tàtari.

Dae sos tzilleris de Tàtari, salotos bonos de su càntigu a chiterra e palestra de medas artistas de cabale, in ue aiat connotu cantadores che a Mannoni e che a Canu e sonadores comente a Merella, est pigadu a subra de su palcu comente professionista, su mese de làmpadas de su 1958, in Cargeghe, a loba cun Cicheddu Mannoni cun s’acumpangiamentu de Adolfo Merella.

Una carriera sa sua, sinnada dae una chirca sena agabu de nche bogare su mègius dae sas capatzidaes de boghe e annou pissighidu in su repertòriu poèticu cantadu, chi carchi borta cunteniat finas testos cumpostos dae issu.

Ponende mente a cussa punna – chi non l’at lassadu mai e li daiat finas un’istile distintu e personale – de perfetzione e seriedade artìstica, at lassadu sas garas in su 1989, ma sena brivare sos amantiosos de su càntigu sou de nde aprèndere sos segretos e su traju, cuntzedèndesi fitianu in seradas foravia, dinnas de ammentu.


Lassat una discografia manna e medas registratziones sena imprenta, totu ispantosas pro cantidade e livellu interpretativu e tantas sunt sa collaboratziones chi ant sinnadu s’atividade musicale sua.


Antonimaria Pala



Pro chie cheret connòschere mègius sa figura de custu cantadore:

Paolo Angeli, Canto in Re, ISRE, 2006 [sa foto de s’artìculu est pigada dae inoghe]
Giovanni Perria, La Gara a Chitarra, Domus de Janas, 2006