Renato Soru incàsciat s'ammiru e s'aprètziu de duos intelletuales de su movimentu linguìsticu natzionàlitariu. In antis Giuanne Lilliu chi firmat su manifestu pro defensare sa Lege Istatutària e como Bachis Bandinu chi sutalìneat chi Soru at cumpresu bene chi s'identidade e sa limba sunt pretziosas pro s'economia. 



In custas dies chi podent èssere detzisivas pro su benidore de su guvernu suo (ca depet colare sas primàrias de su Partidu Democràticu e su Referendum contras a s'istatutària sua), su primu Presidente de sa Regione chi at impreadu sa limba sarda in pùblicu, otenet si non s'apògiu semper e cando su reconnoschimentu de su chi at fatu finas a como pro sa cultura natzionale de sa Sardigna. E non sunt essidas sena tinu nen grabbu ca sos duos òmines chi ant faeddadu sunt connotos pro sa balia e sa seriedade issoro. 



Giuanne Lilliu at reconnotu in un'intervista a Sa Nuova de carchi die como cantu su Presidente at fatu pro sa limba sarda. In su matessi tempus at criticadu Crèsia e Universidade pro su pagu e nudda chi faghent pro sarbare sa limba nostra. 



Su fatu posca chi "tziu Giuanni" si siat ischieradu a favore de sa lege istatutària (e duncas contra a su referendum de su 21 santugaine) no est una faina de pagu capia, ma unu sinnale pretzisu a sos chi si reconnoschent in sas ideas suas pro cumprèndere comente si depent cumportare. 



In die de oe, 8 santugaine 2007, finas Bachis Bandinu in sa Nuova Sardegna at dadu un'intervista importante a Paolo Pillonca narende cosas chi non sunt de seguru casuales in custos tempos.

A parre de Bandinu, di fatis, Soru <...at intuidu bene meda cantu sa limba est una richesa e un'elementu fundamentale in su cuntzetu suo de promotzione de s'identidade nostra a totu sos livellos...>. 



Ma segundu Bandinu, Soru at naradu e rapresentadu finas àteru. <Apo istudiadu totu sos discursos suos e apo sebestadu su messàgiu de primitia chi b'est: issu narat chi s'identidade atenet a s'economia. Si tratat, pro issu, de un'iscumissa pro su tempus benidore. Non de una recuida in dae segus.>



In s'artìculu, firmadu dae Pàulu Pillonca un'àteru intelletuale chi non si cuat cando depet pigare positzione, si narat finas chi Soru at imboladu s'idea de sos consìgeris "marxistas" de sa prima ora pro s'incarrerare a bias a una visione in ue s'identidade (e sa limba) sunt sa fortza primàrgia de s'isvilupu. 



Pensos chi lompent custos dae intelletuales linguisticos-natzionalitàrios e chi dant un'inditu pretzisu de comente si cumportare in custos tempos pro cussos (de su movimentu linguìsticu e non) chi ant a coro chi una polìtica identitària e pro sa limba potzat sighire e s'isvilupare. 


Pro cumprèndere ite b'at de polìticu como in Sardigna leghe a su ligòngiu


http://www.altravoce.net/2007/09/25/morsa.html