Un'àtera faina culturale de importu in sa bidda de Làconi. Chenapura chi benit 3 de su mese de Sant'Andria-Donniassantu a oras de sas chimbe e mesu de merie in su tzentru culturale de sa comuna presentada de su libru de Pàulu Pillonca "Antonandria". Reladores ufitziales Paolo Lusci e Peppe Coròngiu. Ant a èssere presentes su sìndigu Fausto Fulghesu e s'autore de su romazu ogetu de s'initziativa. sa faina est in intro de su programma "Laconi in scena" aparitzadu dae sa comuna cun sa cumpangia teatrale Antas. 


Antonandria est una bella prova de sardu impreau a manera pretzisa e deghile in unu testu literàriu. 

Est unu de sos tretos prus artos lòmpidos dae Pàulu Pillonca in sa vida artìstica sua chi nos at istrinadu poesias, istùdios e produtzione de limba sarda a livellu artu. 

Sos temas chi sunt prus istimados dae su Pillonca iscritore e òmine ddue sunt totus: s'identidade crara de sos sardos de sas biddigheddas de sa Sardigna interna, s'òdiu pro sas malifatias de sa giustitzia, s'amore ispirituale e sensuale, su sentidu de apartènnere a una comunidade antiga, s'amore pro sa limba comente ànima de un'identidade sarda chi est minimandesi e riscat de no àere tempus benidore. 

Sa trama de su romanzu movet dae sa morte de Sonazu, unu pastore de nomenada mala pro furas e isdorrobatòrios, chi enit imputada a s'innotzente Antonandria, chi est innamoradu de sa bella pitzinna Juanna Monne. Ischende de su sùddidu de su magistradu Frassu contras a issu, su giovanu si fuet e si che ghetat a bandidare. Dae custu si isboligat unu intritzu de abenturas e fados chi decretant su ustinu de su bandidu e de sa bidda intrea. Sa fine de su romanzu no est iscontada pro nudda e aberit un'istagione noa pro totu sa comunidade. 

Sa limba (de sèberu setentrionale) est manigiada cun s'arte e sa sapièntzia cun sas cales Pàulu nos at avesadu in custos annos. Est unu artisanu-artista Pillonca, gasi donosu e galanu, chi sa limba chi nd'arresurtat de su traballu suo paret naturale a beru mancari siat frutu de unu passientziosu e aficosu sedatzamentu e afinamentu fitianu.