In custas dies in Friuli sunt aprovende sa lege noa pro s'insignamentu de su friulanu in iscola. In logu nostru su Guvernu sardu est aprontende su chi at promitidu: unu potentziamentu de sas possibilidade pro l'insegnare sema mudare sa lege pro como. Ma at a èssere sa legislatura chi benit cussa detzisiva. Pro su chi pertocat su sardu in iscola, si faghet dae annos medas in paritzos logos.



Ma s'informatzione ufitziale faghet fìgios e figiastros. Vanna Ledda de Piaghe, pro nde mentovare una, lu faghet in Fiolinas comente matèria curricolare dae tempos e tèmporios ma sos giornales non nd'ant mai faeddadu. Riccardo Solinas, in Dolianova, est unu de sos mègius de totu sa Sardigna, ma s'Unione Sarda o su Epolis de Dell'Utri, non dd'ant mai dedicadu mancu una riga. Alberto Antonio Frau in Macumere insignat matemàtica e informàtica in sardu, ma no est leadu a cussideru comente "de moda". 



Chentu e prus istitutos forsis ant isperimentadu su sardu a livellu curricolare, ma su sistema informativu sardu non los esaltat comente àteras esperièntzias. Proite? Forsis ca esaltende àteras atividades (solu teòricas pro como), si chircat de minimare su traballu chi balet pro afortiare a beru su sardu. In particulare si chircat galu de fèrrere sa Lsc, comente chi siat sa madrighe de totu sos dolos. 


Ma est beru? 


In sa bidda de Aritzu, pro nde mentovare una, Maria Antonietta Piga at fatu sardu pro pitzinnos e mastros. Sas materias fiant : limba sarda (grammatica, sintassi, ortografia); geografia antròpica de sa Barbàgia; istòria. <Soe impreande sa LSC pro s'iscrittu - at naradu sa diretora de s'Ufìtziu Limba de Nùgoro - faveddo su nugoresu e siet sas mastras chi sos pitzinnos sichint e cumprendent totu. In cada classe (1, 2 e 3 media) si faveddat petzi in sardu e sunt medas sos chi mi rispondent chenza duda; intre sas mastras calicuna non s'attrivit a faveddare in sardu, ma sunt pacas e menzus a non bi lu narrere. Totu sas materias las faco faveddande chin sos pitzinnos de cosas chi connoschent, impreande fotocopias coloradas e libretteddos galanos, fachendelos bennere a sa lavagna pro iscrivere e chircande de cumprendere a primu sa limba de sa bidda issoro e a pustis s'istandard. Apo giai impreau su libreteddu de "sa terra de sas cosas bonas" e depo proiettare su CD de m.t. catte pinna pro los ispassiare chin sos burattinos. A primu sas mastras fint azicu dudosas, commo si brigant pro chi ande in sa classe a fachere s'ora de letzione>. 



Mancu male chi su sardu e s'istandard in s'iscola nant chi no andat bene...


Un'àtera atividade chi sos mèdios ant belle ignoradu sunt sos cursos de sa Provìntzia de Nùgoro in sas comunas. Acò inoghe mastros e comunas chi ant aderidu. 



1

Geografia linguistica della Sardegna (Dott. Marco. Maulu)

2

Linguistica sarda (Prof. G. Lupinu)



3

Ortografia della Lingua sarda, LSC e varianti locali (Dott. M. Ladu)



4 

Politica linguistica e normativa delle lingue minoritarie (Dott.ssa S. Corongiu)



5

Linguaggio giuridico-amministrativo (Dott. P. Corongiu)



6

Lingua e Letteratura Sarda (Prof. D. Caocci)



7

Laboratorio linguistico, di traduzione (Ufitziu Limba sarda + esperti in variante locale designati dai comuni)



Ant aderidu custas amministratzione pùblicas chi ant delegadu a formare sos dipendentes, sos operadores de isportellu e sa popolatzione interessada. 



n. Comune



1 Nuoro-Provincia

2 Bitti 

3 Borore 

4 Dorgali 

5 Dualchi

6 Lei 

7 Lodine 

8 Lula 

19 Mamoiada 

10 Nuoro-Comune 

11 Olzai 

12 Orgosolo 

13 Orotelli 

14 Osidda 

15 Sarule 

16 Sindia


Sos cursos sunt cumentzados in cabudanni e ant a finire in su mese de Sant'Andria. Sunt sighidos dae gente meda cun aficu e cumplimentos a sos dotzentes chi sunt, segundu sos organizadores, giòvanos e preparados a livellu tècnicu e iscientìficu. In sa Provìntzia de Nùgoro b'at su nùmeru prus artu de isportellos linguìsticos e de comunas delimitadas. In coa a custa classìfica bi sunt dae annos sa Provìntzia de Casteddu, su Sulcis e su Campidanu de Mesu. Finas sa provìntzia de Aristanis, ocannu at fatu cursos interessantes meda e sighidos dae paritzas gente, ma televisione e giornales no est chi l'apant postu in prima pàgina cada die...