Micheli Pinna, diretore de s’Istitutu “Cammillo Bellieni”, tenet de ite èssere cuntentu. Su cungressu de sos ufìtzios linguìsticos, chi s’est fatu sapadu 24 santandria in S’Ulumedu, at bogadu a craru su sabiore e s’abistèntzia de su traballu de custos ùrtimos annos. Un’adòbiu chi, printzipiende subra sas chistiones de s’impreu de su sardu in s’Amministratzione, si nche s’est tramudadu manu•manu in una die bella e dèchida de resurtos galanos. Mescamente ca sunt essidas a pìgiu sas levas noas chi est pesende su Bellieni.

Sos datos polìticos e culturales nant chi, in su Cabu de Susu de Sardigna, mescamente in su territòriu de sa Provìntzia de Tàtari, ma non petzi, s’Istitutu Bellieni at leadu sa ghia pràtica e morale de sa polìtica linguìstica. Finas ponende remèdiu a fartas e ausèntzia de sas istitutziones chi diant àere dèpidu providire a sos impitzos de sa polìtica linguìstica e non l’ant fatu. Nointames custu, sos isportellos abertos e ativos s’acherant a èssere unos chimbanta e sos postos de traballu pro giovanos sunt unos trinta. Sena contare sas oras de formatzione fatas dae espertos de ogni edade. 

Una resposta bella e atzuda a sos criticones fitianos, cussos chi sunt bonos a chircare semper sas faddinas de sos àteros, ma de bonu e de nou non ischint pensare nen creare nudda pro issos e pro àtere. Micheli Pinna, e totu s’Istitutu, at dadu letziones de istile, traballende contras a bentu in tames de morrungiare dae mangianu a merie e atzantarare o fagher brigas de badas. S’est arremangadu, sena rùere in sas trampas de s’ischire acadèmicu dengosu e at fatu sa cosa prus difìtzile: at creadu oportunidades culturales e cuncretas pro sa limba. 

Su cunvegnu at duradu sa die intrea, partzidu in mangianu e merie. Ant saludadu sas autoridades presentes. Sa mangianada s’est intregada a sos istùdios e sos analizos prus iscientìficos. At inghetzadu Pinna etotu faghende una relata subra sa netzessidade de su limbàgiu “fatiscu” pro sa limba ufitziale, traballu chi ant fatu totu sas limbas e chi pro su sardu aiat giai cumentzadu Giròmine Araolla in su 1500. At sighidu Giuseppe Corongiu chi at incraridu unos cantos casos pràticos de tradutzione giurìdica e at marcadu chi su fràigu, o su rennou, de una limba giurìdica tenet bisòngiu de traballos de equipe non de una pessone ebbia. Mauro Maxia at presentadu un’excursus subra sos documentos istòricos ufitziales iscritos in sardu dae su cale essint a craru nessi duas puntos: su sardu tenet una traditzione giurìdica prus longa de s’italianu, ma sos atos pùblicos in sardu sunt presentes mescamente in su tzentru e nord de s’ìsula, pagu in su meridione a probe de Casteddu. 

At serradu sa mangianada Tore Pinna, autore de tradutzione ufitziales e capu de sas guàrdias de sa comuna de s’Ulumedu, chi at naradu chi sa Limba sarda comuna regionale andat bene, ma tocat de la megiorare ponende finas su passadu remotu chi est istadu burradu. Finas a merie b’at àpidu calicuna crìtica subra sos meridionalismos presentes in sa lsc, puru si s’est adduidu a sos sèberos generales de s'istrategia de sa Regione. At respostu su matessi Micheli Pinna, nende chi est importante chi in sa Norma bi siat rapresentadu su Campidanu puru, si nono diat mancare s’unidade de sa limba e si diant fàghere sos errores de àteras propostas chi no ant balangiadu cunsensu.

Maria Dolores Lai at faeddadu posca de s’atividade de s’Istitutu Bellieni nende chi non s’at a firmare, ma a at a sighire pro àteros annos puru. Elena Casu, istudiosa tataresa chi at publicadu de pagu su documentu in sardu “S’exercixiu et arte de corallare in Tàtari in su 1555” chi paret chi l’apat iscritu Araolla matessi, at naradu chi “sa lsc podet èssere finas cumentzada a impreare finas foras dae sos atos ufitziales e leges”. Anna Ulleri, de s’ufìtziu de Piaghe, at contadu sas atividades fatas in bidda sua punnadas meda a impreos traditzionales de sa limba finas cun sas dificultades de cunfrontu intre norma e dialetu locale. Adriana Cocco, de Boruta, at contadu de comente at aparitzadu unu libureddu pro pitzinnos. Rita Puggioni, Fiolinas, at mostradu su situ internet realizadu paris cun s’Istitutu Bellieni.

Istèvene Chessa, de Tissi, at contadu de un’atividade a printzìpios ca at cumentzadu a traballare dae duos meses. Maria Vittoria Loria e Chìrigu Pansale, de Romana, e Maria Franca Marceddu, de Codronzanu, ant fatu ischire dultzuras e amarguras de sos isportellistas chi traballant in bidda issoro. Anna Maria Tavera, de Ittiri, at fatu a bìdere unu cartulàriu ammanniadu pro sos pitzinnos in sas iscolas. Belle totu sos operadores ant fatu tradutziones giurìdicas e de delìberas comunales o de atos indiritzados a sos tzitadinos.

At cungiadu sos traballos s’assessora de sa cultura de S’Ulumedu Gabriella Isoni chi, mancari non siat de limba mama, at faeddadu in sardu. Unu sinnale bellu de isperas noales pro sa limba nostra comente totu custos pitzinnos formados dae su Bellieni chi traballant pro sa matessi idea nostra