Ite cheret nàrrere a traballare in unu ufìtziu de sa limba sarda? Cales sunt sos còmpitos de unu operadore e cales sunt sos isetos de una Amministratzione? Comente si podet fàghere a dare visibilidade a sa limba sarda, in unu mamentu istòricu in ue sas possibilidades sunt meda e sas connoschèntzias (forsis) pagas? Totu custos (e àteros) argumentos sunt istados tratados cun aprofundimentu in su seminàriu de autoformatzione chi s'est fatu in Montresta su 26 e 27 de su mese de santugaine. Su seminàriu, istruturadu a manera chi a ogni interventu esseret currispostu unu laboratòriu de aprofondimentu, at bidu sa partetzipatzione de una rapresentàntzia de sos operadores de totu sa Sardigna, e custu at dadu sa possibilidade de bìere in cale manera sas provìntzias sunt traballende e de pònnere a cunfrontu sas dificultades, chi sunt comunas a totu.

Sa prima chistione posta in sa mesa est istada sa cumprensione de sos motivos chi ant originadu sa presèntzia de sos ufìtzios in sas Comunas de sa Sardigna. S'interventu de Barbara Murru, operadora in s'isportellu linguìsticu de Biddamanna Strisàili, at craridu chi un'operadore de Isportellu devet fàghere de “ponte” intre sa gente e sa limba. Su còmpitu suo est de mediare intre su nou (sa limba sarda iscrita) e su betzu (sa limba faeddada), agiuende sa gente a cumprèndere chi s'istandard est un'istrumentu in prus chi si tenet, e no una dificultade.
Un'aprofondimentu a custos arguementos l'at dadu Bobore Bussa, istudiosu de limba sarda e de traditziones populares, chi at ispiegadu comente sa comunicatzione in sardu tenet sas matessi règulas de cussa in cale si siat limba: tocat de ischire “bèndere” su produtu, cun sas modalidades addatas a sas dies de oe. S'errore chi s'est fatu carchi borta in su tempus passadu est istadu de impreare, pro sa comunicatzione in sardu, istrumentos de “sèrie B”, presentende duncas su produtu-limba comente “pagu appetìbile”.

Curreladu a custos duos interventos est istadu cussu de Alessandro Porcu, operadore in s'isportellu de DeximuMannu, chi at faeddadu de pianificatzione linguìstica e de su vantàgiu de tènnere un'istandard pro dare prus balore a sa limba. A pustis de ogni relatzione si sunt fatos sos laboratòrios de aprofondimentu, in ue sos operadores, a coro a pare cun su Sìndigu e sos Amministradores de Montresta (chi ant partetzipadu cun interessamentu mannu a sos traballos de ambas dies) ant bogadu a campu ideas, dificultades, propostas pro unu cras.
Sa presèntzia costante de sos Amministradores at dadu sa possibilidade de bìere su traballu de s'Ufìtziu finas dae un'àtera prospetiva, bidende e cunfrontende su chi sas Amministratziones isetant dae sos operadores e su chi sos operadores cherent dae sas Amministratziones, in unu clima de serenidade chi at permìtidu un'iscàmbiu de opiniones produtivu meda.

Sas propostas pro unu cras sunt meda: sa prima est de fàghere àteros laboratòrio de autoformatzione de custu tipu, aprofondinde temàticas e istudiende mègius sas normas de sa LSC (operadores meda si ritenent pagu ferrados in custu argumentu). No est sa prima borta chi sos operadores de Isportellu lamentant sa dificultade de traballare a sa sola e sena èssere formados in manera ispetzìfica. Forsis custu de Montresta podet èssere unu primu passu pro creare una rete de traballu chi, partende dae sas bases (sos operadores) arribet a sa solutzione de totu cussos problemas pràticos chi oe creant dificultade. Isperamus chi si potzat andare a in antis serenamente in custa istrada e chi custu traballu siat frutuosu.

Gianfranca Piras
ULS Montresta