Cada bortas chi si depet obèrrere unu nou ufìtziu de sa limba o unu isporteddu linguìstigu, tocat a fàghere is contus cun sa realidade in ue semus postus…chèrgio nàrrere chi sa finalidadi printzipali de unu Ufìtziu de Limba Sarda chi oberit cun finantziamentus pigados dae sa leghe 482/99 est cussu de fàghere connoschere e promotzionare sa Limba chi sa RAS si at leadu che a Limba Istandard, in prus a is àteras formas de traballu chi si podent leare che a obietivus (intzertos) trasversales (de tresu) comente valorisatzioni de is variantis localis e de sa cultura sarda, servìtzius pro sa comunidadi de sa bidda o de sa tzitadi de referèntzia.



Pro fàghere custu, a bortas, podimus acatare dificultadis medas, chi pertocant a diferentis rasonis: su spantu e s’assustu de sa genti a impreare unu istandard chi no siat sa Limba issoro est nòdidu meda, sa retissèntzia, sa malesa, de is Aministratzionis pùblicas a si iscapiare dae sistemas polìticus chi faghent de su istandard sa rasone issoro de pelea podet èssere prus pagu nòdidu. Tando podet sutzèdere chi carchi Aministratzioni siat in positzionis cuntràrias a s’impreu e a su manìgiu de sa Limba Sarda Istàndard, pro no dispiàghere a su sìndigu chi pensat aicci e totu de pèrdere carchi posìbili elettore…in logu de èssere issus is primus -comenti partis de sa Regioni- a promòvere su istàndard a is tzitadinus issoro.



Su fatu est chi mancat s’informatzione, o chi is informatzionis no sunt retzèvidas bene…chèrgio nàrrere chi semus arròscius de fàghere cunvènnios e seminàrios, de nos leare genti che a polìticos istudiòsos de sa Limba, acadèmicos chentz’e nàrrere nudda o menzus narende totu e nudda!...totu cosas chi abarrant in su paperi e bo! Sa positzione no da podimus leare nosus, in su sentidu chi nosatrus operadoris de sa Limba no podimus nos permìtere de incumintzare una gherra, a solus, contra a is Aministratzionis chi no cherent impreare su istandard; sa RAS nos depet agiudare….comente??, faghende leghes pro esèmpiu, faghende a manera chi s’impreu de su istandard a intru de is Aministratzionis Pùblicas bèngiat neztessàriu, o a su nessi chi s’impreu suu siat unu òbrigu in cada Ufìtziu o Isporteddu de sa Limba Sarda finantziadu cun su dinai de sa 482/99.



Tocat a pònnere is Aministratzionis pùblicas in cunditzionis de traballare in paris a is Ufìtzius de sa Limba, immoi sa situazioni prus lèggia est de traballare in una realidadi chi no cunsiderat s’Ufìtziu o su Isporteddu comente unu settori de s’Enti Locali in ue est postu: unu Ufìtziu de sa Limba Sarda tenet sa matessi importàntzia istitutzionali de unu Ufìtziu de s’Anàgrafe o de su Protocollu etz…no c’est peruna collaboratzioni, e no sunt rarus casus chi s’operadori depet ghirare totu su logu pro si leare is documentus de portare in sardu, e si ciorbeddare pro s’inventare cosas de fàghere … mancat unu istandard de is protzeduras chi unu ufìtziu cunformadu depet sighire.



Sa RAS si depet mòere pro dare a totus is Ufìtzius de sa Limba unu vademecum o a su nessi unu istandard de protzeduras pretzisas e detailladas dae sighire. Depet fàghere essire unu vocabolàriu de LSC, e una gramàtiga chi no siat unu meru librixeddu informativu in apendixi a sa delìbera de sa varianti istàndard. Tenemus abisòngiu de cosas cuncretas pro traballare paris e bene…scetti gosi si podet leare unu resurtadu, petzi si semus in sa matessi lìnia e si andamus a su matessi sonu podimus nos fàghere intèndere…tocat a si nche bocare is chentu berritas e a pònnere totus cantus sa conca in sa matessi berrita..!



Alessandro Porcu

uls Deximu