Su Sótziu culturale SentidoS est nàschidu e cheret traballare po li dare s’importu chi lis ispettat a sa limba, a sas traditziones e a sa cultura de cust’ísola. 
Est galu incominzande a ghetare sos primos passos, comente a unu pizzinnu minore e, che a isse, andat abbellu, pro èssere pius forte e seguru.

In custos meses amos pensadu de traballare pro fàghere connòschere unu pagu sa literadura sarda, in limba o finzas in italianu. E amos abbrontadu unu progetu de presentare in tantas biddas chi lean parte a sa manifestatzione Cortes Apertas, Autunno in Barbagia. Su progetu l’amos lumenadu Allegas de ammentu, ca pensamos chi s’allega, iscritta o nada, in sa cultura nostra at tentu e tenet galu oe una valura manna. 

S’àndala de su tempus antigu sighit a nos pònnere ifatu in custa soziedade in ue totu devet èssere globalizzadu. E sas immàzines chi torran a conca sun fotogràfias chene colores de domos minores ma fatas mannas dae sa gente chi bi istaiat semper a andalutorru in sas fàinas de cada die e semper gherrande cun peleas mannas. Sas manos fin sas meres de totu. De sas allegas e de sas chistiones puru. 

At iscrittu Mialinu Pira: “E si unu lumene oje do a cuss’epoca es custu: su tempur de sar manos, ca issar fachiana e issar faeddaiana”. 

Sas manos e sas allegas sun mamas de su própiu mundu, de una realidade chi oe podimos torrare a bídere in carchi manifestatzione culturale, ma chi dae semper s’agatat in sas pàginas de sa literadura sarda, chi meda at fatu pro li sighire a dare cussa vida chi sos ómines de oe non sun resèssidos a mantènnere. Medas iscritores sardos an impreadu, in cada colore e manera, sas allegas issoro pro contare su contu de custu mundu passadu. E tando sas allegas sun ammentos chi nos faghen a bisonzu pro nos suvènnere totu su chi su tempus nos at dadu in donu e chi galu nos carignat su coro.

Su progetu nostru cheret, tando, acumpanzare “sos ammentos” chi bi sun in sas cortes cun sos branos pigados dae sa literadura sarda chi azuden su visitadore a li torrare a conca cussas manos antigas impreadas in sas fainas de su tempus coladu: in sa ‘innenna, in s’ammàniu de su vinu, de su pane o de su casu e de totu sas àteras cosas chi innantis naschian intro ‘e sas domos. S’intessione est cudda de aunire sa sabiesa antiga de sas manos cun s’abilidade e sa fantasia de sos iscritores chi sun reséssidos a frimmare intro sas pàginas de unu libru s’istória de un’ísola de prendas cuadas. 

Una manera pro mudare custa manifestatzione, pro permíttere a sos trastis postos in sas cortes de ammostrare totu sa bellesa issoro cun s’azudu dadu dae sa valura de s’allega e finzas unu modu pro fàghere connòschere a sa zente s’importu mannu de sa literadura sarda in s’istória passada, ma in sa chi at a bènnere puru.

Salvatore Satta, Grazia Deledda, Pedru Mura, Peppino Mereu, Montanaru e àteros iscritores connottos in pare cun àteros pagu lumenados ant a pigare a sa manu sos visitadores pro che los giughere in cussu mundu de su tempus coladu semper vivu in sa fantasia e in s’iscritura issoro. 

Cherimos tando cumbidare tottu sos amigos de Sotziu Limba e tottu sos chi an piaghere, a bènnere a abbaidare custu traballu isperande de resèssere, a su mancu pro una die, de fàghere connòschere sa richesa de sa cultura sarda.

Nos azis a agatare in Atzara su 26 de Sant’Andria e in Fonne su 8-9-10 de su mese de Nadale.




Associazione culturale SentidoS