Novidades in libreria de limba e cultura sarda dae sas domos editoras Condaghes e Domus de janas. Est essidu pro sa domo editora Condaghes su libru de Giusepi Pili "Su corpus, sa personi" una regorta lessicogràfica de su dialetu de Cabuterra pro bìere comente unu tempus si dessinaiant sos mermos de sa carena umana. Est unu analizu onomasiològicu chi tenet basamentu in s'esperièntzia fitiana de sa vida de sa bidda a prope a Casteddu chi s'autore at averiguadu cun passione. In su testu essint a craru sos sinnos de distintividade de sa limba sarda e de su dialetu ogetu de sa chirca. Giusepi Pili (Cabuterra 1955) est unu maistru de is iscolas elementares de Sarroch e s'est laureadu in su 2003 in Iscièntzia de sa Formatzione in s'universidade de Casteddu. Cun sas editziones "Grafiche del Parteolla" at publicadu "I colori. Analisi lessicografica dei dialetti del Sulcis geografico". 
De su matessi editore Condaghes una proposta pro connòschere mèngius sa realtade sotziulinguìstica de sa Sardigna. "Lingua, limba, linga. Indagine sull’uso dei codici linguistici in tre comuni della Sardegna" a incuru de Mauro Maxia est unu traballu nàschidu in s'afatèriu de unu progetu iscolàsticu redatzionadu pro su Istitutu comprensivu de Pèrfugas. S'inchesta averiguat belle 40 mìgia datos bogados dae intervistas a belle milli persones in sas comunas de Erula, Laerru e Pèrfugas. Intre is resurtados prus importantes su fatu chi su gadduresu est galu faeddadu meda, mentres su sardu est in dificurtade pro more de farta de trasmissione generatzionale. Mauro Maxia (Pèrfugas, 1953) est unu linguista e formadore de limba e literadura sarda. At publicadu sàgios medas ispetzialìsticos de fonètica, etimologia, onomastica, filologia e òperas istòricu-culturales. Insignat limba sarda comente professore a cuntratu pro s'universidade de Tatari. 
De carchi interèssiu fintzas su libru de Giovanniu Perria publicadu dae Domus de Janas editore de Ceraxus "La gara a chitarra". Est s'istòria de su cantu monòdicu acumpangiadu dae sas chiterras chi est nàschidu in un'àera setentrionale de sa Sardigna ma chi contat apassionados e amantiosos in totue. Gasi comente aiat fatu Andria Deplanu pro su tenore e Pàulu Pillonca pro sos cantadores "a bolu", Perria contat s'istòria, sos eroes, su passadu e su presente de custa forma de musicalidade culturale populare. Giovanni Perria est nàschidu in Narbolia in su 1944 est unu presentadore professionista e grandu connoschidore de sa realtade folclorica isulana. At fatu su professore de lìteras in sos liceos e publicadu medas àteros libros. In medas l'ammentant comente presentadore istòricu de "Sardegna Canta" in sos annos otanta de su sèculu coladu. 

Dim. 15x21 cm
Pagg. 512
Anno di edizione: 2006
ISBN 88-7356-092-X
Collana: Samanunga
Prezzo: 30,00 Euro 

Dim. 15x21 cm
Pagg. 192
Anno di edizione: 2006
ISBN 88-7356-091-1
Collana: Samanunga
Prezzo: 12,00 Euro