Segundu su chi narant s'editore e s'autora, su romanzu "Meledda" de Marianzela Dui est cussu chi, in sos ùrtimos annos, at bèndidu de prus. Sa Condaghes de Casteddu decrarat chi sas còpias bèndidas sunt istadas belle 1700 e chi duncas s'òpera s'est dèpida torrare a imprentare puru. 

Comente si leghet in su libru <... In su contu de una pitzinna, como imbènnita vetza, sa vita de una família intrea chi rucrat unu tretu chi, dae úrtimos de s’Otichentos, arribat a sos primos setant’annos de su Novichentos. Dolores, ispajos, richesa e povertate. 

Travàgliu in sa mina e zente disterrata. Su dolu de su coro de una bidda intrea chi resessit a giumpare anneos e mala sorte chin fortza e dignitate, contatu chin su lepiore de unu contu in s’oru de sa ziminera>. 

S'òpera aiat bìnchidu su Prémiu “Grazia Deledda” 2005. Marianzela Dui naschit in Lúvula su duos de tríulas de su millenovichentoschimbantanove dae Lino Dui e Isperàntzia. Istudiat in Casteddu e a pustis ghirat a bidda, uve bivet chin sa família sua. Sichinne su passu de Callina e de Masetu, gollit sos istranzos de posata in domo sua e paris a issos essit a “Sas Puntas” e a àteru locu puru, si n’ant gana. 

Cussu tantu de còpias bèndidas sunt una nova bona pro totu sa literadura limbuda proite cheret nàrrere chi unu mercadu b'est e chi est pretzisu andare a lu chircare. Medas de cuddos romanzeddos italianos isbandierados dae sos giornales non lompent mai a cussu tretu de bèndidas.