Sa Regione at seberadu s’iscritore Gaine Ledda pro fàghere su comunicadore-testimòngiu de sa limba sarda in sas iscolas. S’artista de Sìligo e su presidente de sa giunta regionale Renato Soru ant firmadu, in Casteddu su 7 de Sant’Andria-Onniassantu coladu, un’intesa inue si prevedint inteventos, dibàtitos, cunferèntzias e “performance” de s’autore de “Padre padrone” in istitutos e entes iscolàsticos de totu sa Sardigna. 

S’iscopu de custa faina est cussu de torrare a lughe pro sos sardos chi si nche sunt ismentigados s’importu de sa subrabivèntzia e de s’impreu de sa limba de minoria sarda. Gaine Ledda at a lèghere a sos iscolanos cantos de su libru suo prus famadu chi est bortende in sardu pustis chi at connotu ispàinu in totu su mundu cun sa versione originale in italianu. 

A dies de oe, pro sa Regione, s’idea chi unu iscritore chi at connotu fama mundiale iscriende in italianu torret a sa limba sarda, podet èssere de esempru e de ghia pro sa sotziedade intrea e mescamente pro sos pitzinnos chi ant pèrdidu o sunt perdende su donu de sa limba mama istòrica de sos sardos. A onni manera, fintzas in àteras minorias europeas si inditant a fitianu personàgios famados pro sas campannas publicitàrias in favore de su re-impreu de sas limbas minorizadas. In Sardigna, a s’in capas, custa est sa prima bia chi si proat a fàghere unu esperimentu de su genere.

Totu movet dae s’aprovatzione, fata su 18 aprile 2006, dae sa Giunta Regionale, de sas normas isperimentales pro una Limba sarda comuna. S’iscritore, chi at iscritu intre àteros libros fintzas “Lingua di falce” e “Sos chimentos de s’anzone”, s’at a mòvere proponende fintzas custu esperimentu chi pertocat a sa limba sarda amministrativa in essida dae sa Regione. 


S’initziativa de sa Regione est in unu tretu galu “simbòlicu” de sa polìtica linguìstica aplicada a sa realtade sarda, ma nd’est una novidade chi diat tocare a non leare segundu avesos betzos de sa manera de pensare sarda (proite Ledda e non deo…imbìdia.. crìticas… e gasi e gasi sighende). De bonu b’at chi semperecando su guvernu regionale, in oras difìtziles, amustrat unu carchi interessu pro sa chistione de sa limba in sas iscolas. 

A sa sotziedade sarda, a s’artista incarrigadu, e a sos operadores de sa limba de minoria su còmpitu como de chircare de valorizare cantu prus est possibile custa ocasione istrinada dae sa podere regionale. 

Sos atòbios de Gaine Ledda s’ant a fàghere in sas iscolas, ma podent èssere amprados fintzas a entes, sòtzios, universidades e àteras entidades. Chie est interessadu a aparitzos podet chircare s’iscritore de Siligo o s’ufìtziu comunicatzione de sa Regione in www.regione.sardegna.it . 


© diariulimba