A bias tocat de nàrrere su pecadu ma non su pecadore. Ma custa borta in Diariulimba chèrgio fàghere publicidade a s’imbesse, non prus novas dae su benidore ma dae su coladu. Custu ca a bortas est mègius a lèghere una cosa sena ischire chie l’at iscrita, lèghere antis su pecadu e a pustis connòschere fintzas su pecadore. “S’istòria antiga de sos sardos”est unu insertu in chimbe puntadas chi est essidu onni sàbadu in s’Unione Sarda, e chi at faeddadu de sa Sardigna dae sa ruta de s’imperu romanu a sa nàschida de sos giudicados. 

Chirchende de bìdere in un’òtica diferente s’istòria de sa terra nostra sena cumplessos de inferioridade e nemancu bolende èssere tropu manniosos, sena abbaidare a sa Sardigna comente logu in colada de àteros pòpulos e culturas, sena abarrare tunchiende pro sas cosas de su coladu chi galu non si connoschent bene e chi si cheret a sighire chi siat gasi, ma abbaidende a su mègius chi sa Sardigna at bogadu a campu in annos e annòrios. 

Chie l’at iscrita? Tocat a l’atrogare, l’apo iscrita deo. Agradada o nono, a seguru non ca so birgongiosu o timorosu, pro unas cantas chistiones redatzionales, chi no isto nemancu a bos contare, non bi podia ghetare firma, cosa chi intames apo pòdidu fàghere cun un’àteru progetu chi est on line in su giassu semper de s’Unione Sarda e chi sighit cussu de s’annu passadu. “Sa crèsia sarda intre creìngios e superstitziones” est unu progetu chi cheret fàghere divulgatzione a manera moderna acaratzende sos fatos suta unu puntu de bista istòricu che a cussu de s’incuisitzione, o iscientìficu che a su parre pro esempru de su CICAP chi est su comitadu subra sas afirmatziones chi pertocant a su paranormale, a bias duncas suta forma sagìstica a bias suta forma de paristòria àteras galu suta forma romanzada. 

Bos podides cullegare a su giassu de s’Unione Sarda e a manu dereta, suta su logo de videolina b’at una cresighedda in ue carcare pro intrare, sinono inoghe agatades sos duos progetos in lìnia, cussu nou e cussu betzu, bonu ispàssiu.

Sa cresia sarda intre creìngios e superstitziones annu II 

Sa cresia sarda intre creìngios e superstitziones annu I