Est mortu eris a 94 annos Pepe Sòtgiu, unu de sos ùrtimos cantadores mannos de sa poesia a bolu. Dae tempus patiat pro una maladia chi lu custringhiat in domo màrturu e lu impegniaiat a fàghere curas istentosas e peleosas. Pro sos chi sighint galu su mundu de sas garas est una dispedida chi sinnat un'istasone trista. Sòtgiu si fiat giai retiradu dae sos palcos dae tempus meda, ma sighiat a dare atentu a totu su chi costaiat in Sardigna in argumentu de cultura e limba sarda. Lassat in doda unu tempus malu pro su chi pertocat su benidore de sas garas a bolu in limba sarda.


Fiat naschidu in Bonorva su 24 de làmpadas de su 1914 e si fiat impostu, mescamente in sa segunda metade de su Noighentos, comente unu de sos isteddos prus lùghidos intre totu sos cantadores sardos. Sa tasida de sas garas in pùblicu decretada dae sa Crèsia in sos Annos Trinta, l'aiat impeigadu de cumentzare sende minore in sos palcos, cosa chi faghet imbetzes su sero de su 9 de santugaine de su 1939 in Foresta Burgos, in provìntzia de Tàtari, cun Andria Nìnniri e Tommasu Pinna Gherrinu. Dae tando sa carriera sua si fiat illestrada meda e fiat bènnidu unu de sos artistas prus istimados dae sas pratzas prenas de pùblicu. S'annestru poèticu e culturale chi li daiat sa bidda nadia sua non fiat pagu cosa, gasi comente sas virtudes personales suas. Totus li reconnoschiant una boghe galana, unu tràgiu chi cumbinchiat a beru e un'abilidade in s'argumentare sos temas tratados chi, cunforma a su chi narant sos crìticos, at tentu pagos assimìgios in s'istòria de sa poesia improvisada. 

Cumpàngios fitianos suos in sas garas fiant Barore Sassu, Barore Tucone, ma mescamente Remundu Piras. Cun custu ùrtimu "Peppe" Sozu faghet croba fissa pro trinta annos faghende nàschere s'idea de sa "gara" a primore, cudda chi in sas biddas de Sardigna de sos annos Chimbanta, Sessanta e Setanta s'isetaiat totu s'annu comente avenimentu mannu e chi totus ascurtaiant a sa muda. Comente Piras matessi, Sozu s'est impignadu meda in sa defensa de sa limba sarda chi arriscat de iscumpàrrere in pagu tempus e de èssere sustituida dae s'italianu. In su 1989, sa bidda de Bonolva at dedicadu a su poeta, chi est biu galu oe, un'ispetàculu pro festare e reconnòschere sas virtudes umanas e poèticas suas. 


Pro un'iscumprou prus mannu de sas òperas de Sòtgiu cunsigiamus de lèghere sos libros de sa domo editora Domus de Janas in www.domusdejanaseditore.it 

Pro novas subra s'istòria de sa poesia a bolu cussigiamus finas http://www.sardegnacultura.it/linguasarda/letteratura/poesiabolu/ in ue b'at carrigadas finas garas de Sòtgiu registradas e iscritas

inoghe s'artìculu de Pàulu Pillonca in sa Nuova Sardegna