il flnc rende onore al Tiberi il giorno del funerale. cuntzissioni Un

“In dolu”, cussì puru in de noi so tanti kissi ki piegnini la morthi di lu Patriotu Anghjulu Maria Tiberi, caggiuddu lu cuatru di ginnaggiu passaddu a Solaru, i l’impreu di lu dovere di ghirreri di la libarthai di lu Paesi soiu. No pudimmu cagliatzi addanantzi a la santa prigonta d’indipendentza di lu Popolu Corsu e di la viurentzia ki imprea la Frantza, “Patria di li diritti di l’ommu”, pa ischudunalla. La riprissioni mara di li reparti ispeziali antitarrurismu contru a li naziunalisti corsi è cuadda bè addreddu a una cara “dimucratica”. Cussì è pa lu Populu Corsu, apprittaddu a subì e custhrintu a reagì. I lu 2006 l’attintaddi cumpriddi so isthaddi più di 230, cuasi 65 in più di l’annu primma. 
No tzi pudimmu caglià! Fa finta di nudda pa lu ki è sutzidendi in kissa terra cussì afaccu a la nosthra e immintigà ki li cuasi sessanta prisgiuneri pulitici natziunalisti so soru la punta di iceberg di una situazioni culunialistica ki nisciuna passona o Paesi tzivili po più barià. Lu F.L.N.C, ki pa la Frantza è una trumadda di dirincuenti, è kissu ki rimani a lu Populu Corsu sintzeru pa difindì avveru l’intaressu di la Nazioni Corsa, da la linga a la terra. Ma la “Frantza manna” sighi a assè riddostha a li prigonti di lu Populu Corsu pa abè lu legittimu puteri di detzisioni i la matessi terra d’eddu. La Frantza dazi cussì proba di cantu è cadroddu kissu modus operandi ki, pa mantinì forthi lu pristiggiu puliticu internu e internaziunali, poni in crozi un populu intreu.
Lu sintiddu di Anghjulu Maria Tiberi era, inveci, kissu ciaru di un ommu ki isthimaba, imparaba e frabiggaba, i la tratta lassadda da l’antigghi soi, l’indipendenza di la Corsica. Lu sacrifitziu soiu è tistimoniu. Kisthu sintiddu d’ammintà li patrioti militanti, cumenti Tiberi, nasci aki kisthi matessi so lu riferimentu universali di li populi in combatta pa li printzìpì di la libarthai e di la digniddai. Pa kisthi virthui femmu curona a lu durori di lu Populu Corsu e ammintemmu kisth’ommu, si puru noi no lu cunnisciami, cun ripettu e onori pa assè isthaddu un suldhaddu di la resisthenza patriotica. 



Fabritziu Dettori
Thathari