Est essidu in libreria pro sa Cuec de Casteddu su libru nou de Eliseo Spiga "La sardità come utopia, Note di un cospiratore". Est unu curiosu e galanu contu inue s'autore mesturat esperièntzias de sa bida sua pessonale paris cun unu analizu istòricu-filosòficu de peleas antigas e reghentes de s'istòria sarda. Spiga istòriat pessonàgios e acadessimentos isulanos segundu su sedatzu de unu cufrontu intre Modernidade e Comunidade chi diat àere bidu sa comunidade (o sas comunidades) ètnicas sardas in deruta giai dae sos tempos de sa conchista fenìtzia. Su tempus presente, a parre de s'autore, est a prope de annuddare s'identidade sarda. Ischissiosu est su retratu de sos annos de su neosardismu e de sa proposta de lege popolare de su 1978 subra sa limba sarda fata dae unu comitadu règhidu dae Cicitu Màsala cun Spiga chi fiat vicepresidente. Finas si non si cumpartzit s'analizu e su pessimismu, si cunsìgiat de lu lèghere pro sos istìmulos filosoficos-natzionalistas chi dat.