Sa revista iscientìfica catalana "Llengua i dret", in sa setzione "Estudis" , at publicadu in s'ùrtimu nùmeru (46/2006) unu sàgiu de Giuseppe Coròngiu tituladu "Llengua sarda comuna: primera història, esperit polìtic i forma futura". Sa publicatzione ufitziale de sa Escola d'Admnistraciò Pùblica de Catalunya de sa Generalitat de Catalunya at publicadu finas unu mentovu de su libru de Coròngiu "Guvernare cun sa limba". In s'artìculu, s'autore lacunesu chi oe traballat pro sa Regione Sardigna, contat sas peleas chi ant giutu a s'aprovatzione de s'istandard ùnicu amministrativu connotu comente "Limba sarda comuna". Sunt ispiegados finas paritzos passàgios sotziolinguìsticos e psicosotziales chi ant marcadu su dibàtitu in Sardigna. In sa revista b'at finas unu istùdiu de Rafael Caria, s'ùnicu sardu chi faghet parte de s'IEC, subra sas propostas pro sarvare su catalanu de s'Alighera. In prus si podent agatare artìculos de istudiosos e acadèmicos subra su tratamentu de sa limba giurìdica e amministrativa in sas limbas ispannolas e catalanas, problemas terminològicos e normativos in Canada, sa limba e su deretu a s'educatzione in sos Paisos Bascos e àteru. Su diretore de "Llengua i dret" est Antoni Mila i Massana, catedràticu de deretu amministrativu in s'universidade autònoma de Barcelona. Secrètariu est Jaume Vernet i Llobet, catedràticu de deretu costitutzionale in sa Universidade Rovira i Virgili. De su comitadu de redatzione faghet parte finas Carles Duarte i Montserrat, Antoni Badia, Pere Martì, Aina Moll, Francesc Vallverdù e àteros.