"Est ora chi sos iscritores sardos impreent s'istandard nessi pro sas iscrituras non artìsticas". L'at nadu chenàpura 23 coladu Antoni Maria Pala, autore de su romanzu Addia, in sa presentada de su libru chi at fatu in Dolianova paris cun Paola Alcioni co-autora de su matessi romanzu. A bisu de su poeta-iscritore de Torpè (Nu) como ca sa Regione at tentu ormai su coràgiu de ufitzializare e isperimentare sa Limba sarda comuna, siat puru in atividades amministrativas, est pretzisu chi sos autores de sa literadura a manera libera lu potzant isperimentare issos matessi. "Mancari in situatziones chi non siant de emotzionalidade artìstica comente sàgios, giornalismu o àteru". Segundu Frantziscu Casula, chi at presentadu su libru a su pùblicu de sa libreria comunale, "sos iscritores ant a sighire a iscrìere onnunu comente li essit finas a cando sa limba no at a intrare bene a iscola. Tando sas cosas ant a cambiare".