Est abertu in fines s’isportellu linguìsticu de sa Regione Autònoma de Sardigna. Carchi die a como sos primos operadores, Micheli Ladu e Cristianu Bècciu, ant cumintzadu a traballare in sa sea de s’assessoradu regionale Istruzione Pùblica in Casteddu. Belle paris cun custa atividade, nd’at mòvidu un’àtera de importu parìvile. Sunt inghetzados, di fatis, sos cursos de formatzione pro sos funtzionàrios e impreados regionales diretos dae sa facultade de Lìteras e Filosofia de s’Universidade de Casteddu. Sos iscritos, chi sunt giai frecuentende sas letziones, sunt prus de chentu. Sinnu custu chi s’argumentu interessat sa burocratzia de s’istitutzione autonòmistica. 



In s’isportellu, de oe a carchi die, ant a èssere impreados àteros duos operadores chi ant a agiudare sos primos isportellistas titulares. Sos primos traballos de fàghere sunt subra su lèssicu generale de sa limba sarda comuna e unu ischema de grammatica normativa. Sa faina est finantziada dae su Guvernu Italianu cun sa lege 482 e s’est pòtzida fàghere gràtzias a unu progetu, presentadu in su 2003 dae su consulente Pepe Coròngiu, chi como (a battor annos de distàntzia) s’est resessidu a cumprire. Pro sos progetos 482 de sas annualidades imbenientes sa Regione at seberadu de finanziare s’Atlante Toponomàsticu amparende atividades de istitutziones acadèmicas. 



Sas iscritziones massivas chi bi sunt istadas in sos cursos pro sos dipendentes regionales ant custrintu Maurizio Virdis, diretore iscientìficu, at crobare e istagiare sos impreados in duas classes. Sas primas 48 oras de letziones sunt intregadas in totu a Coròngiu e Ladu chi sunt impitzados a insignare “Impreu de sa limba in s’amministratzione” e “Primos annestros de Limba sarda comuna”. Unu mòdulu de formatzione istandard chi si fundat subra metodologias didàticas modernas, cumpartzidas a livellu europeu e averiguadas dae istitutziones acadèmicas. 



Sa Regione in su 2005 aiat cunvocadu una cummissione de espertos pro propònnere una norma linguìstica pro sos atos ufitziale in essida de s’amministratzione. Su 18 de abrile de su 2006 sa Giunta Regionale aiat aprovadu sa Limba sarda comuna cun una delìbera traduida in sardu pro sa prima bia in s’istòria de s’autonomia. Carchi mese a como, in su giassu Sardegnacultura, sunt istadas publicadas sas tradutziones a norma de s’Istatutu Ispetziale e de sa lege subra sa limba e cultura sarda. Ateros atos s’ant a tradùere luego. 



Sunt acanta de èssere publicados finas sos datos de sa Chirca Sotziolinguìstica chi teniat a iscopu de iscumproare s’istadu de sa limba in Sardigna e sa mentalidade de sos sardos in conforma a custu problema. Ant èssere publicados, intre pagu tempus, finas àteros istùdios subra sa norma istandard seberada. 



In custos ùrtimos annos dae su 2001 a oe, cun sa 482, Istadu e Regione ant gastadu 2.685,172,06 èuros in su 2006, in su 2005 èuros 1.874.554,17 e in su 2004 1.985.731,48 èuros. Non totu custu dinare sos entes locales l’ant ispesu. Cun s’annualidade 2004 si sunt finantziados 168 isportellos linguìsticos (20 in sa provìntzia de Casteddu, 13 in Ogiastra, 46 in Aristanis, 47 in Nùgoro, 26 in Tàtari, 4 Olbia, 9 in Campidanu de Mesu e 3 in su Sulcis). Sunt ativas tres provìntzias: Nùgoro, Aristanis e Ogiastra. In àteras provìntzias traballant duos sòtzios non guvernativos comente Istituto Bellieni e Sòtziu Limba Sarda. Pro su 2006 sunt lòmpidas 254 dimandas de isportellos linguìsticos. A oe resurtant delimitadas, in cunforma a s’artìculu 3 de sa lege 482, 266 comunas sardas pro una populatzione de belle 1.200.000 abitantes. 



In fines paret chi sa Regione s’est movende, nessi pro carchi cosa. At a èssere pagu a paragone cun Catalùnia, Euskadi e finas Friuli, peroe custas cosas non l’as aiat galu fatas nemos. In s’isetu de iscaretzire, in custa o in s’àtera legislatura, su nodu prus mannu de sa chistione: cussu de s’iscola. Isperende de tènnere sa polìtica in favore e cumpetèntzias didàticas prus mannas in intro de su movimentu linguìsticu. Ca finas a como, su chi s’est bidu, est entusiàsticu meda, ma pagu atzivu. 



su dotzente Giuseppe Corongiu cun su Diretore Iscientìficu de is cursos Prof.Maurizio Virdis de s'Universidade de Casteddu

su dotzente Michele Ladu