Ant a èssere presentados in Paulilàtinu sàbadu su 5 de maju sos risultados de sa Inchesta sotziolinguìstica cumandada dae sa Regione a sas universidades sardas. A sas 9 e mesu de mangianu, in cara a su presidente Renato Soru, paritzos relatores ant a faeddare subra sas ideas, parres, opiniones, avesos e impositos de sa popolatzione sarda subra sas chistiones linguìsticas chi pertocant sa Sardigna. 



Su tìtulu ufitziale de sa manifestatzione est “Limba sarda comuna. Una chirca sotziolinguìstica” e previdit sas relatas de sos professores Anna Oppo de s’universidade de Casteddu e Giovanni Lupinu de s’ateneu tataresu subra “Sas limbas de sos sardos. Una chirca sotziulinguìstica”. 



Sighit Roberto Bolognesi (universidade de Amsterdam) chi at a contare de sa chirca sua subra “Limba sarda comuna e sas variedades traditzionales de su sardu”. 



Posca sa paràula at a andare a sos cumponentes de sa commissione chi aiant redatzionadu in su 2006 s’istandard ufitziale de sa Regione e chi aiant dadu sos inditos pro pro pònnere in òbera s’inchesta sotziolinguìstica (Giulio Angioni, Diego Corraine, Mario Puddu, Maria Teresa Pinna Catte, Manlio Brigaglia, Michele Contini). 



Est prevista una dibata pùblica. At a cungiare sos traballos s’iscritore Gainu Ledda cun calicuna letura. Renato Soru at a fàghere sa sìntesi de totu sos traballos. 



Est de importu chi chie crèet a sa chistione de sa limba sarda siat presente sa die pro fàghere intèndere a totus, e mescamente a Soru, chi custu est unu problema sentidu dae sos sardos.


Podet èssere puru chi bi siant novas bonas.