Su Consìgiu provintziale de Trento at aprovadu s’11 de lampadas una lege noa de politica linguistica. Su testu est passadu a majoria manna a segus de una proposta fata dae su presidente de sa provìntzia Lorenzo Dellai. Sa lege noa de sa provìntzia de Trento diat tènnere sa mira de introduire in s'òrdine giurìdicu italianu su cuntzetu, giai presente in Ispagna, de limba "pròpria" de unu territòriu. In prus si cheret pònnere sa limba de minoria a òbligu pro intrare a traballare in s'amministratzione pùblica. Ladinos, tzimbros e mòchenos no isetaiant àteru.

In su territòriu de sa provìntzia sas comunidades de minoria sunt tres: sos ladinos de sa Badde de Fassa paris cun sos tzimbros e sos mòchenos chi faeddant variedades de creze germànica. Su disinnu de lege 289, chi tenet a tìtulu "Norme di tutela e promozione delle minoranze linguistiche locali" fiat istadu presentadu carchi mese a como, morende s’annu passadu, e a pustis de èssere adduidu in commissione est lòmpidu in s’àula de Trento giai se guru de èssere aprovadu.

Carchi cuntierra s’est registrada petzi ca algunos consigeris provintziales cheriant chi in sa legge esserent intrados finas sos abitantes de sa Badde de Non chi, pustis sa lege 482/99, aiant torradu a recuperare sas raighinas antigas ladinas chi aiant ismentigadu. Ma sende chi in s’istatutu ispetziale provintziale trentinu non si faeddat de custa minoria, custas protetziones in prus non las ant reconnotas.

Sa lege est finas unu provedimentu chi chircat de donare prus conditziones de privilègiu a sos ladinos istòricos pro los cumbìnchere a non si ch’andare in provìntzia de Boltzanu organizende referendum a custu iscopu. Ma rapresentat semper e cando un’atividade de importu pro sas minorias chi istant in Itàlia chi tenent situatziones e istados diferentes meda.

Pro nde ischire de prus incarca in custos liòngios