Non faghet a nàrrere chi so logudoresu. A nudda. Ca non potzo!

1. Non so logudoresu ca su sambenadu meu, gasi comente totus lu pronùntziant sonat comente un’agetivu meridionale, chi in sa leada mia si narat “betzu”, s’italianu “vecchio”. Cun sos amigos chi si narant Murgia, Vargiu, Sotgiu tenimus sa matessi bona sorte: sambenados iscritos de una manera, istandardizados e ufitzializados dae s’anàgrafe, ma cun pronùntzia locale chi abarrat sena tocada: “Mulza”, “’Alzu”, “Sozu”. S’assessora nostra etotu, a dae chi est intervènnida in Làconi at naradu chi in bidda sua li naraiant Monzu, finas si in s’iscritura abarraiat Mongiu. Custa metodologia, de iscrìere in una manera e de pronuntziare cunforma a su connotu, la semus impreende dae cando b’est s’anàgrafe. Come chi serbit a nos aunire comente sardos, no! Ognunu a sa moda sua, una babele grafica chi at fatu prus dannu chi non profetu.

2. Non so logudoresu ca “logudoresu” est un’agetivu chi nos ant atacadu sena lu chèrrere. A parre meu non partit dae sa gente. Proade a preguntare a unu paesanu meu, otieresu, inue istet. Bi giogo s’iscommissa chi at a respòndere “in Otieri”. E si sighides cun sas preguntas,  at a nàrrere “in provìntzia de Tàtari”, posca “in Sardigna”. Nche brincat sa definitzione de “Logudoro” ca, bene cun bene semus in su Monte Acutu, gasi comente aiant batijadu sa comunidade montana. Babbu e mamma, a dae chi leaiant arresonu, mai los apo intesos faeddare de “logudoresu”. Si lis abbisongiaiat de faeddare in limba cun italòfonos, a manera prus ladina, naraiant “mi nch’est essidu in sardu”, mai “in logudoresu”. Si perdiant sa diplomatzia retòrica, pro non imboligare paràulas, naraiant de àere faeddadu “a sa sarda”, mai “ a sa logudoresa”. Como totus s’ant bestidu s’uniforme cun s’iscrita “logudoresu”, mescamente sos chi no ant mai contivigiadu su sardu. Sos chi no ant mai iscritu una riga de sardu, e si l’ant fatu, sas paràulas non torraiant mai una pretzisa a s’àtera, in su matessi testu. Sos chi ant pesadu sos fìgios in italianu. Nos cherent insingiare totu. Si si fiat agatada donna manna mia, a sa sarda, dereta bi lis aiat abboghinadu: “non mandigades e non lassades mancu mandigare!”

3. ca si sa LSC, gasi comente paritzos la cramant, in blog, forum e chat est logudoresa, balla, tando su limbàgiu chi deo faeddo currispondet belle pagu a s’istandard iscritu regionale. E non lu naro brullende. Est simple·simple a lu cumprèndere. M’apo leadu sas normas de sa Regione e lèghidu 46 paràulas chi cuntenent su resurtu de 46 nessos cunsonànticos latinos. S’ischit chi s’ossadura de su lèssicu sardu, pro su prus, est su latinu, no? Tando apo abertu unu documentu word, insertadu una tabella a tres colunnas. In sa prima apo postu una cale si siat variedade meridionale, iscriende gasi comente diant iscrìere cuddas paràulas; in sa segunda culunna sa variedade mia de Otieri, chi l’apo numenada “setentrionale, dende atentzione a nche torrare in su fòlliu, a su chi apo pòdidu, sa pronùntzia . In sa de tres sas paràulas normalizadas cunforma a s’istandard iscritu LSC.

Acò sa tabella

Posca mi so ispassiadu (in bidda narant “divertidu”, ma m’aggradat de prus custa forma meridionale, a sa cale apo annantu una i- pro règula. E chi non bèngiat unu campidanesu a mi nàrrere chi no at cumpresu su verbu!) e apo postu a banda totu sas paràulas chi in sa variedade mia s’iscrient che pare a sa norma. 24  subra  46. Semus faeddende de su 52 pro chentu ebbia.

.

Leende cuddas meridionales chi currispondent in totu a sa norma. In teoria sunt 16 de 52. Su 34 pro chentu.

Ma si bi ponimus finas custas 7 chi mudant feti pro sas vocales finales, tando nche lompimus a 23 subra 46. Su 50 %. Custas sete paràulas, iscritas comente cherent sa norma, las diant pòdere atzetare sena problemas ca agiudant sos chi no ischint pronuntziare a sa meridionale. Difatis, bidende una -e o una -o finales, tando sa vocale de sa sìllaba anteposta est pronuntziada aberta (Bolognesi bos lu diat acrarire mègius):

A nde balet sa pena a istare semper a murrùngiu, gherrende, brighende, partzende sardos? Pro unu 18% in mancu, chi si cherimus nche falat a su 2%!

Cale si siat norma iscrita, cale si siat istandard no at sa punna de acuntentare a totus. Antis, deper pro fortza discuntentare unu pagu a totus! E mi paret chi lu fatzat, no? Est ora de nche l’acabbare cun custas partziduras sena contu. Comporade·bos ulleras/ispijitos noos, pro compudare sa limba. Torrade·bos a istudiare sa teoria “degli insiemi”. Leade esempru dae sos colores: non bi nd’at unu muntone, sunt tres ebbia de fundamentu cun s’annanta de àteros duos,  ammesturende·si, essint a campu totu sos àteros. E s’asulu at sa matessi dignidade de su colore de aràngiu: ambos duos sunt colores. Ponide mente a Bolognesi, a dae chi faeddat de continuum, non de partzidura, non de segmentos, ma de continuum, una de sas prus bellas definitziones aplicadas a su sardu.

E non chèrgio a nàrrere chi deo so logudoresu e faeddo in logudoresu. So sardu e faeddo in sardu.