Est torrende a leare logu nòdidu sa mùsica pop in limba sarda. S'ùrtimu discu de sos Tazenda, "Vida", gràtzias forsis finas a s'agiudu de Eros Ramazzotti, est bendende meda, in Sardigna e in Continente. Unu motivu de cuntentu e giudu pro sa limba sarda, sende chi sos artistas de custu grupu musicale ant dae semper dadu preferu a su manìgiu de sa limba in sas cantzones issoro. 



Finas sa lòmpida de una prima boghe noa, Beppe Dettori, at agiudadu sa revesa de custa grefa de sonadores chi, giai in su tempus coladu, aiat giuadu meda a s'isparghidura de sa limba sarda cun discos chi non sessant mancu oe de èssere dignos de ascurtu. Sa morte de Andrea Parodi, a cantu paret, no at fatu dannu mancu a sa sigla chi aiat abandonadu annos a como. 



Ma s'agradu chi ant torradu a balangiare sos Tazenda non depet fàghere ismentigare totu sos àteros cantantes pop (rock, rap, etno) chi in Sardigna, cada die, sighint a iscrìere e cantare cantzones in sardu. Un'atividade fata a supridu chi sighit a mantènnere bia sa traditzione linguìstica de su pòpulu nostru mescamente in sas levas noas. 



A s'ispissu sunt nùmenes connotos, ma de cando in cando, finas artistas bravos chi, pro paritzas resones, non resessent a essire a craru mancari chi apant calidades, gèniu e grabu. A ogni manera, custu setore est galanu ca sighit a si mantènnere a sa sola (sena de fiàntzia pùblica) pro more de sas festas in sas biddas e de sos comitados chi los mutint a cantare. 



Oe in die in capas est cussa sa mùsica sarda "populare" verdadera. Finas prus de carchi forma folclorìstica meda bantada e pagu achistiada.



No est unu mundu totu a frores de chelu. Antis, s'apubat chi b'at gherras rebestas e cuncurrèntzia intre sos operadores de custu mundu. Sa televisione sarda, chi traballat a "lobbies", allughet o lassat in umbra custu o cuddu cantante. Ma su chi est peus est chi sa làcana cun su mundu de su folclore no est crara e, a bias, riscat de cunfùndere sas abbas. 



A dae chi su folclore est divenidu unu mundu chi, paritzas bortas, est faghende a mancu de sa limba, custa no est cosa bona meda. A bìdere grupos folclorìsticos de gente chi non faeddat su sardu, e non l'imparat a sos pitzinnos, naschet finas su desìgiu de bìdere tancada calicuna trasmissione tv. Ma forsis semus malos...



E puru su folclore veicoladu in italianu contrìbuit a s'italianizatzione cumpleta de s'ìsula, lassende s'illusione chi si mantennet carchi cosa de s'identidade. Imbetzes est àliga-arga consumìstica ebbia, finas si costùmenes e ballos sunt parte de bundu de s'identidade nostra. Forsis, postos in un'àteru cuntestu chissai...(?!)



Gasi comente su folclore sunt, a dolu mannu, paritzos prèmios literàrios "de limba sarda" in ue "in limba sarda" (a banda sas òperas iscritas) b'at pagu e nudda. Non si nàrgiat de fàghere nessi sas presentadas in pùblicu in sardu, mancu su bandu de su cuncursu e su manifestu de recramu traduent...



Ma, a disafiu e balentia, sa "Vida", stanti·stanti, nos regalat alientu e ispera. Gasi est pro custu ùrtimu discu de sos Tazenda: raju de sole lùghidu in custu istiu de bonas uras pro sa limba nostra.