Iscriere sas leges a manera simple cun una limba chi totus potzant cumprèndere, ma chi non perdat sos caràtires de istrumentu normativu ufitziale. Est sa punna de sa Regione Sarda chi at adotadu chida colada unu manuale pro redatzionare testos legislativos. Su libreddu "Regole e suggerimenti per la redazione dei testi normativi" diat dèpere agiudare sos funtzionàrios chi traballant pro iscriere atos de lege a sighire cussas regulas de base pro resurtare in bonas fainas. S'adotzione de sa ghia naschit de una proposta de su presidente Soru a cuntzertu cun s'assessore Massimo Dadea. <S'assessoradu a sos afares generales - si leghet in una nota - in sos ùrtimos tempos at dadu bida a initziativas diferentes punnadas a sa simplizatzione de sa produtzione legislativa e a su acumprimentu de una calidade normativa mèngius. In su tempus benidore amus a firmare unu protocollo de abatu cun su Cunsìgiu Regionale a modu de pòdere traballare paris>.