Segundu su chi relatat oe in s'Unione Sarda Maria Paola Masala, s'iscritore oranesu Sarbadore Niffoi at faeddadu in sardu in sa presentada sua de sa de tres editziones de su Festival de Gavoi. Custu sèberu, chi diat èssere su prus naturale pro unu romanzeri sardu in Sardigna, at pesadu calencuna cuntierra dae parte de su crìticu Filippo La Porta e dae s'àteru iscritore casteddàrgiu Nicola Lecca chi pro polemizare ant faeddadu in ingresu. Abbarrat su fatu chi, mancu unu romazu o òpera in sardu fiat presente in custu festival chi diat chèrrere presentare sa literadura sarda in su mundu. A mancu chi, leende coràgiu dae custa esperièntzia Niffoi, chi resurtat unu de sos iscritores sardos de como de prus vena e tinu, non nos istrinet unu romanzu in sardu pro s'annu chi benit.