Turtas at sighidu in cust’àndala ammentende chi su Cuntzìliu etotu reconnoschet in sa limba sarda unu traste pro sa veicolatzione de sa fide, ca pro mèdiu de su sardu sa gente no at petzi imparadu sa fide ma finas a pregare.”Deus tenet bisòngiu de su sardu, e finas su mundu” at ammentadu in antis de colare a una chistione chi intames no est bona meda. Ca sa Crèsia su prus de sas bortas in Sardigna at fatu sa cantonizatzione finas de sos santos, est a nàrrere chi at creadu dae sesi cussas pertzetziones faddidas a pitzu de santos cabususesos o de giosso gasi comente est acuntèssidu a Santu Gaine o o ghetende in s’olvidu a santos che a Santu Lussùrgiu.

E difatis custa cantonalizatzione e pertzetzione non pertenet petzi a sos santos ma finas a sa limba. In custu s’ùrtimu relatore Antoni Pinna at pesadu prus de unu murrùngiu cando at acraradu sos mètodos de tradutzione de sa liturgia chi ant a portare a una trìade chimera de sa liturgia in sardu . Ismentighende∙si difatis che a òmines de Crèsia comente a Araolla o a Vidal chi punnaiant a una limba comuna, Pinna at presentadu a sa gente unu paperi cun sa sinossi de sa liturgia in UNA limba ebràica, in UNA limba greca, in UNA limba latina, in UNA limba italiana e in OTO formas sardas de iscritura e bortadura, chi punnant a èssere TRES ma chi galu non sunt limba ma petzi dialetu. In prus su mètudu impitadu si fundat a pitzu de “pertzetzione, dinamitzidade, sonu, naturalesa, galania, formalidade” chi lassant abertas preguntas e dudas meda.

At a èssere finas pro custu chi b’at custa cautela in intro de su cleru?