|
|
Diretore: -
Coord.Editoriale: Micheli Ladu |
|
CHISTIONES |
|
|
03/06/2008
Una fase noa po sa limba
[de
Roberto Bolognesi] |
Tra pagu amus a tenner una lee noa po sa limba.
Amus a tenner una lee prus adata a sa realidade de is bisongios nostros. At esser una lee po passare dae sa diglossía a su bilinguismu beru, chi nosi at a permitter de fagher de su sardu una limba normale.
Custa non est cosa de si spantare: custa lee noa est su frutu de su trabballu mannu chi amus fatu in custos annos.
Meda de custu trabballu dd’at fatu Pepe Corongiu e seu siguru ca, in sa positzione istitutzionale noa aunde issu s’agatat immoe, at a sighire a trabballare bene.
Ita at a cambiare custa lee? Totu e nudda: meda dipendet ancora de nosus e totu.
Ita at a cambiare candu su sardu at a intrare in sa scola?
Totu dipendet de sa manera de nche ddu fagher intrare.
Immoe a nosus nosi tocat a fagher partire unu dibatitu a pitzos de comente su sardu depet intrare in sa scola: che materia de studiu—comente chi fessit una limba strangia ?—o che limba “veicolare”—ca tanti su sardu ddu schint totos?
O totu e is duas cosas, spostende s’acentu a segunda de una situatzione o de s’atera?
E cale depet esser sa relata, su raportu, tra s’imparu de su sardu e su de s’italianu?
E s’imparu de su sardu podet serbire puru a imparare s’inglesu, o dd’at fagher prus difitzile?
Comente at a fagher sa gente chi trabballat in is scolas a detzider a subra de custos probblemas?
Is maistros de scola, a su in prus, a pitzos de custas cosas non nch’at mai arrexonadu. Est ora de incumentzare unu dibbatitu pubblicu chi serbat a agiudare siat a sos maistros siat a is politicos a pigare una detzisione a pitzos de custos probblemas.
Un’atera cosa bella de custu dibbatitu iat esser ca, po sa primu borta, iat esser unu dibbatitu a pitzos de duos obbietivos positivos—fagher a una manera o a s’atera, ma fagher!—a su postu de unu dibbatitu intra is chi bolent fagher e is chi non cherent fagher.
E un’atera cosa de importu mannu chi bolet discutida est cale bariedade de su sardu depet intrare in sa scola.
Depet esser su dialetu de su logu?
O una lingua ufitziale e aunida e uniforme?
O su dialetu de su logu, ma scritu in una grafía comuna a totu is bariedades de su sardu?
Ddoe sunt ateras cosas medas de discuter in manera costrutiva, ma po immoe bastat. Spero de bosi aer stimoladu a una discussione de importu e basada a pitzos de un’ategiamentu nou, costrutivu e abertu. E duncas spero de leger is reatziones de bosateros.
|
|
|