Si b'at àpidu duos entes chi in sos annos si sunt distintos pro sa polìtica linguìstica cussos sunt de seguru sas provìntzias de Nùgoro e Aristanis. Su cabu de logu barbaritzinu si podet nàrrere chi est istadu su primu, moende dae su 2002, a pònnere in òpera sos primos ufìtzios de sa limba isperimentados in Cuartu Sant'Aleni finas a su 2001. Sa tzitade giudicale, in ritardu de carchi annu, si fut posta in evidèntzia cun un'atividade manna de promotzione linguìstica in sos annos 2006-2007.

Oe in die, su bilantzu de custos duos entes est galu in ativu pro ite ca sos àteros ant fatu pagu. S'Ogiastra est moende sos primos passos (positivos). Sa Regione s'est dotada carchi die como in s'assessoradu de s'Istrutzione Pùblica de unu servìtziu dedicadu a sa limba cun funtzionàrios e dirigente chi sunt impignados a totu die petzi pro sas leges 482 e 26. Sas àteras provìntzias risultant pagu prus o mancu " non pervènnidas " ca sunt ausentes de su totu dae una polìtica linguìstica cuncreta. Comunas comente sa de Cuartu, chi unu tempus contaiat carchi cosa, como sunt rutas in s'ismentigadòrgiu ca sos polìticos si sunt afidados a operadores faddidos.

Nùgoro e Aristanis, chi de sa limba aiant fatu bandela, podent duncas sighire a bìvere de renda. Ma pro cantu tempus sende chi ant petzi, tres s'una e duos s'àtera, isportellistas precàrios, malepagados e sena perunu reconnoschimentu polìticu cuncretu? E puru Tore Cubeddu, Marinella Marras o Mariantonietta Piga, ant amostradu a totus, in campu abertu, cantu balent e sunt cumpetentes. E diant merèssere de èssere istabilizados o integrados a manera prus istàbile in intro de sas amministratziones. Ca si nono sa politica linguìstica de Onida e Deriu, presidentes de sa provìntzia, paret unu pagu istrumentale: proclamas e dinari leadu meda, investimentos e bonucoro nudda.

No est petzi una chistione personale de Marras, Piga o Cubeddu. Est una chistione generale chi pertocat sa beridade de cantu balet de a beru sa chistione de sa limba pro sas sìngulas amministratziones provintziales o finas cumonales. Cantu est dispostu a istantziare onni sìngulu sìndigu, o presidente, pro sa limba sarda in bilantzu annuale? Sas cosas si podent fàghere petzi ca b'est su dinari de sa Regione e de s'Istadu? Sas comunidades locales bi creent de aberu in sa limba? Tando lu dimostrent istabilizende chie traballat in su mundu de sa limba.

Sa Regione, cun sa lege 9 de su 2006, at trasferidu a sas provìntzias unu muntone de dinari e cumpetentzias pro sa limba e cultura sarda. Si podet dare chi onni annu arribent belle belle 2 miliones de èuros e prus. Est una bella summa. Ite nd'ant fàghere sos presidentes de sas provìntzias? Su detzentramentu at a favorèssere sa politica linguìstica? S'ant a fàghere initziativas pro sa limba o giardinetos e sagras folclorìsticas?


A Onida, Deriu (chi ischimus chi traballant pro sa limba) e a sos àteros sas respostas (cuncretas).