|
Lucio Angelo Porcu pregontat a isse e totu e a nois a bėdere cale lčssicu impreare in su giornalismu in sardu. Betzu comente so de baranta annos de professione, belle e binti in Itālia e āteros e tantu in Sardigna, isco chi sa chistione pesada dae Porcu est de sas prus pistighingiosas pro sa bida de sa limba sarda. Ma in antis de mi la tentare cun un'imposta mea, bālgiat su chi bālgiat, deo credo chi tochet in antis de averguare si sos giornalistas traballende in Sardigna sunt "sardigiābiles" o si, a s'imbesse, diat tocare de s'imbentare un'iscola de giornalismu sardu.
Un'iscola chi, chčrgio nārrere, imparet a cussiderare sa limba sarda (e paris cun custa sa cultura sarda) non petzi unu mčdiu pro nārrere cosa ma, prus a prestus, parte de una weltanshauung. Non so narende, bella diat čssere, chi totu devisimus pessare chi custu cuntzetu de su mundu e de sa bida chi est in intro de sa limba sarda siat giustu e de leare a pedra a su paragone de sos portamentos nostros. Custu no est presumidu e bia. Diat čssere cuntrāriu a cale si siat libertade, de imprenta, de pessamentu, de parāula. Su chi naro est chi tocat de ischire chi custa weltanshauung b'est e chi cun custa tocat de fāghere sos contos, non cun cuntzetos angenos.
S'arresonu arriscat de čssere longu e intritzidu meda, ma, pro nārrere, una filoera giornalistica at semper punnadu a bortulare in disvalore unu valore. Su de sa balentia, pro nārrere. Ant bombardadu gasi a fitu sos cherveddos nostros chi oramai cando intendimus faveddende de balentia non pessamus a unu valore de s'ānimu sardu ma, a s'incontrāriu, a sa titulia, a sa vilesa, a sa prepotčntzia. Unu protzessu de disnatzionalizatzione de sa cultura sarda a custu at giutu: a lis dogare a sas allegas sa sustāntzia chi issas cabent. Gasi chi nudda cāmbiat a iscrėvere, pro nārrere, chi unu balente at mortu unu criu o a iscrėvere chi un balente ha ucciso un neonato.
Arresonu longu, fia narende.
Torrende a su contu, ca cantzone bona a su cumintzu torrat, Porcu at pesadu una chistione de importu. Cale lčssicu, duncas, pro su giornalismu in sardu?
S'imposta non podet čssere si no una e una e bia. Su de sa LSC, sa chi b'est o sa chi isse pessat podat essire dae unu megioru de sa chi b'est. Unu giornalismu chi non si chčrgiat folclore - che a su chi sunt predighende sos inimigos de un'istandard, custu o un'āteru pagu importat - devet impreare sa matessi "limba in essida" de sa Regione sarda.
No isco como, ma cando deo abitaia sa televisione cadalana, in un'aposentu acutzu a sa redatzione b'aiat unu grustu de pessones chi curregiant sos artėculos de sos giornalistas cunforme a s'istandard. E sighiant a lu fāghere bint'annos e prus de pustis chi sa Catalunnia aiat adotadu s'istandard. Custu pro nārrere chi s'operatzione cumintzada in Sardigna cun sa Lsc no est unu protzessu de su pagu prus o mancu. Est longu. E giughet a s'iscopu petzi si cumprendimus chi unu contu est a faveddare e unu contu est a iscrėvere.
Medas collegas meos italianos, in domo, in tzilleri, cun sos cumpāngios faveddant su romanu o su turinesu, ma cando iscrient iscrient s'italianu istandard. E pessas chi bogant sos maghines chi bogant sos chi cuntrastant sa Lsc?
Gianfranco Pintore
3493695809
|