B'at àpidu un'assemblea carchi die a como in una bidda de su Campidanu de Casteddu contras a s'istandardizatzione de su sardu. Antzis paret chi sa cosa siat contras a s'istandardizatzione de ogni limba pro ite s'organizadore in sa lìtera in italianu chi at fatu girare pro propagandare s'initziativa at iscritu "qual'è la lingua sarda?" imbetzes de "qual è la lingua sarda" comente si diat dèpere nàrrere in italianu istandard curretu segundu is grammaticas prus nòdidas. Sa riunione (in carchi presentatzione de libru s'at bidu prus gente) fiat a magioria non pro sa defensa de sas sìngulas limbas de is biddas, ma pro sa proposta de duos istandard artifitziales de su "logudoresu" e de su "campidanesu" chi (mègius a ddu nàrrere) sunt fatiscos e impositivos gasi comente sa Lsc, sa mesania de Mario Puddu o sa Lsu. 

Petzi ca sunt duos e raddopiant is problemas in tames de los minimare. At intervènnidu polìticos de livellu provìntziale chi ant naradu chi sa prospetiva depet èssere cussa de sa limba ùnica comuna amministrativa e de sighire a faeddare ognunu su dialetu de bidda sua (e non duas macrovariedades imbentadas dae sos linguistas, dae sas rivistas leteràrias o dae sos cantadores). Ateros polìticos e iscritores annuntziados non bi fiant. Accò unu cantu de sa  lìtera iscrita dae s'organizadore chi chertat cun s'italianu istandard. 


...Cari amici,
discutendo di lingua sarda, ognuno di noi si è posto o si è sentito porre almeno una volta la domanda: "qual'è la lingua sarda?"
Il Convegno del 30 maggio 2007, RIFLESSIONE SU UNA STANDARDIZZAZIONE MODERNA E DEMOCRATICA DEL SARDO (Capoterra, Casa Melis, ore16.30 - raccomandiamo a tutti la puntualità -), , darà risposte e proposte molto precise in merito alla fatidica domanda...


Forsis est mègius regordare chi in sa Chirca sotziolinguìstica su 57,7 de sos sardos s'est decraradu a favore de una "limba ùnica" pro s'amministratzione. Sos contràrios a cust'ipòtesi sunt prus o mancu su 30% e currispundent curiosamente a cussu 30% chi s'est decraradu contras in totu a sa limba in is ufìtzios. Chie est a favore de sa pratzidura de su sardu in duas limbas est minoritàriu intro de sa sotziedade sarda e intro de is operadores de sa limba puru. A ogni manera, sa Lsc est petzi una limba in essida pro calicunu atu iscritu dae sa Regione, duncas non si cumprendet bene su pro ite de s'avolotu imbetzes de produire in sas variantes chi si cherent "sarvare" dae sos "furbos omologadores". 

Ma forsis est solu crisu pro cale si siat règula o istandard iscritu, finas cussu de sa grammàtica italiana.