Sa cultura sarda in digitale andat in Europa sena ismentigare su sardu. Su portale de sa Regione Sardigna www.sardegnacultura.it est istadu presentadu in sas dies coladas in Brussel dae su presidente de sa Regione Renato Soru chi l’at propostu a sa Cummissione comente contributu de s’ìsula a sa Biblioteca Digitale Europea. “Sardegnacultura” est unu giassu internet pùblicu inue si podet agatare totu sa produtzione, s’istòria, sas òperas de sa cultura sarda in 40.000 ogetos e testos digitalizados e postos in lìnia a grabbu de chiesisiat si chergiat collegare e lègere. In custu traballu innovativu e democràticu su Guvernu Sardu at antetzipadu a totus, ca pro s’Unione Europea sos tempos disinnados pro sa partèntzia de sa Biblioteca fiant cussos de su 2007, o massimu 2008. Intames, in su giassu aparitzadu dae sa Regione Sardigna si podet intrare giai dae carchi mese pro unu annestru a subra de 5.000 annos de istòria sarda dae s’època prenuràgica a cussa contemporanea, o pro andare prus a fundu cun sas connoschèntzias cun fotografias, pellìculas, libros, informatziones, crìticas, biografias e serbìtzios. B’at setziones intregadas a s’Architettura, Traditziones, Etnologia, Istoria de s’Arte, Benes Culturales, Teatru, Poesia e totu cussu chi si podet disigiare de ischire in argumentu de tzivilidade sarda. Su presidente de sa Regione Soru at faeddadu cun aficu de sa limba sarda (chi est bene rapresentada in su portale finas cun una parte ischirriada pro sa literadura in sardu) cramande-la <la lingua della nostra isola> e annuntziende chi diat essere mèngius a traduere su portale, chi como est petzi in italianu, in ingresu e in sardu. Pro fraigare “Sardegnacultura” e la pònnere in retza b’at chèrfidu mancu de 6 meses de traballu, 300.000 èuros de gastu e una volontade politica de afortiamentu de s’identidade culturale sarda chi in custos meses est boghende a craru initziativas importantes. Comente cursos de limba pro insignantes e funtzionàrios, o s’adotzione pro còdighe iscritu de sos atos pùblicos regionales de sas normas de una Limba sarda comuna chi podet essere su cumentzu de unu traballu nou pro sos sardos chi sunt interessados a s’unidade de sa limba. In www.sardegnacultura.it si podet agatare finas una curiosidade: su Babbu Nostru tramandadu dae su casteddargiu Sigismondo Arquer in su Chimbighentos in unu sardu chi assimìgiat meda a cussu de sa proposta regionale. Unu documentu chi ponet calencuna duda a subra de chie acusat sa LSC de essere artifitziale e chi sustenit chi su sardu non siat una limba unida. 

Liòngios 

Limba e literadura in sardu 
http://www.sardegnacultura.it/linguasarda/

Literadura de sa Sardigna (in àteras limbas chi non siat su sardu) 
http://www.sardegnacultura.it/argomenti/letteratura/

Chie at traballadu in su portale de sa Regione 
http://www.sardegnacultura.it/credits.html

Su Babbu Nostru in sa limba sarda comuna de Sigismondo Arquer 
http://www.sardegnacultura.it/j/v/253?s=20169&v=2&c=2679&c1=2732&t=1